ىلە الاتاۋى پاركىندە ءسىبىر ەلىكتەرى فوتوتۇزاققا ءتۇسىپ قالدى

 الماتى. قازاقپارات - الماتىدا ىلە الاتاۋى ۇلتتىق پاركىنىڭ تەرريتورياسىندا ورنالاستىرىلعان فوتوتۇزاققا ءسىبىر ەلىكتەرى ءتۇسىپ قالعان. بۇل تۋرالى پاركتىڭ فەيسبۋكتەگى پاراقشاسىندا جاريالاندى، دەپ حابارلايدى قازاقپارات ءتىلشىسى.

ىلە- الاتاۋ ۇلتتىق پاركىنىڭ اقساي فيليالىنىڭ بيولوگ- اڭتانۋشىسى ساكەنوۆ نۇربول باستاعان عىلىمي زەرتتەۋ جۇمىستارى جانە تاۋلى اگروبيوالۋانتۇرلىلىك ءبولىمى مەن جانۋارلار الەمىن قورعاۋ جانە ءوسىمىن مولايتۋ ءبولىمى ماماندارى وسى فيليالعا قاراستى شاتقالعا فوتوتۇزاق ورناتقان بولاتىن.

 سونداي- اق، ماماندار تۇياقتى جانۋارلارعا ارنالعان قورەكتەندىرۋ استاۋلارى مەن تۇز جالايتىن ورىنداردى تەكسەردى. باقىلاۋ كەزىندە ماماندار ورماننىڭ اشىق الاڭقايىندا جايىلىپ جۇرگەن ءسىبىر ەلىكتەرىن (Capreolus pyqarqus) سۋرەتكە، ۆيدەوعا ءتۇسىرىپ الدى. بەينەكادرعا بۇل جاققا سيرەك اياق باساتىن 6 ءسىبىر ەلىگى ءتۇسىپ قالعان.

ىلە الاتاۋى ۇلتتىق پاركى ماماندارى ايماقتاعى فلورا مەن فاۋنانىڭ تىنىس- تىرلىشىگىن قاتاڭ باقىلاۋدا ۇستاپ وتىرادى.

بىلتىر 13 - جەلتوقساندا تۇڭعىش رەت ىلە الاتاۋىندا الاندارىن ەرتكەن قار بارىسى فوتوتۇزاققا ءتۇسىپ قالعان بولاتىن.

بەينەكادردا 3 ءتۇز تاعىسى تاۋ بەتكەيىن بويلاي ماڭعاز باسىپ كەتىپ بارا جاتقانى ءتۇسىپ قالعان. ۇلتتىق پارك ماماندارىنىڭ باعامداۋىنشا، كامەرانىڭ الدىنان ۇرعاشى بارىس 1,5 جاسار كۇشىكتەرىن ەرتىپ وتكەن.

 ايتا كەتۋ كەرەك، الماتى بيلىگى وسىعان دەيىن جويىلۋدىڭ از- اق الدىندا تۇرعان قار بارىسىنا ارنالعان زووباق اشاتىنىن حابارلاعان بولاتىن.

ەرەكشە كۇزەتتى تالاپ ەتەتىن نىسان ادامدار بارا بەرمەيتىن بيىك تاۋدا سالىنادى. ونداعان گەكتاردى الىپ جاتقان تەرريتوريادا تاۋ ەشكىلەرى، بۇعىلار مەكەندەيتىن بولادى. بۇل قار بارىستارىنىڭ قورەكتىك بازاسى بولماق. بيىل زوولوگ عالىمدار مەن زوولوگيا ينستيتۋتىنىڭ وكىلدەرى عىلىمي زەرتتەۋ جۇرگىزىپ جاتىر.