استاناداعى پيراميدانىڭ قالاي وزگەرەتىنى بەلگىلى بولدى

استانا. قازاقپارات - بەيبىتشىلىك جانە كەلىسىم سارايىنىڭ ىشكى كورىنىسى جاڭا مازمۇنعا يە بولادى، دەپ حابارلايدى استانا اكىمدىگىنىڭ رەسمي سايتى.

«قۇلانشى» زامانۋي ونەر ورتالىعىنىڭ جەتەكشىسى لەيلا ماحات بەيبىتشىلىك جانە كەلىسىم سارايىنىڭ قىزمەتى قالاي وزگەرەتىنىن ايتتى.

«ءبىز نىساندى جاڭا ەنەرگيامەن تولىقتىرۋدى جوسپارلاپ وتىرمىز. مۇندا ساۋلەتشى نورمان فوستەر ويلاپ تاپقان ستيلگە سايكەس كەلەتىن بارلىق بولمەلەردىڭ ادەمى، جايلى بولۋىن قالايمىز. كونسەرتتىك جانە كورمە باعدارلامالارى، الەۋمەتتىك جوبالاردىڭ ۇيلەسىمدىلىگى ماڭىزدى»، - دەيدى ل. ماحات.

پيراميدادا سونداي-اق كوۆوركينگ ورتالىعىن قۇرۋ جوسپارلانۋدا.

«بارلىعى ءبىر ماقسات جولىندا جۇمىس ىستەۋى كەرەك. ول - بەيبىتشىلىك پەن كەلىسىم سارايىن وڭ جانە دۇرىس ەنەرگيامەن تولتىرۋ»، - دەدى ل. ماحات. سونىمەن قاتار، قالا اكىمدىگى پرەزيدەنتتىك ساياباقتى جانە ىرگەلەس اۋماقتى قايتا جاڭارتۋدى جوسپارلاپ وتىر.

«ءبىز جوبانى جۇزەگە اسىراتىن اۆتوردى انىقتادىق. وعان «ەنتسيكلوپەديا ساياباق»، «ەجەلگى ونەر جانە تەحنولوگيالار مۇراجايى» سىندى تولىقتىرۋلار ەنگىزىلەدى. اۆتورلار كەستە دايىنداپ، قۇرىلىس ەكى كەزەڭگە ءبولىندى. ساياباق پەن وعان ىرگەلەس اۋماقتار جاڭارتىلادى»، - دەدى قالالىق ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى باقتىباي تايتاليەۆ.

قالا اكىمى باقىت سۇلتانوۆ سارايدىڭ قىزمەتىمەن تانىسىپ، ونىڭ ىشكى وزگەرىستەرى بويىنشا ۇسىنىلعان تۇجىرىمدامانى قولداپ، «ەركىندىك ءۇشىن» جانە «Arteria» كورمەلەرىن زەردەلەدى.

سونىمەن قاتار، قالا باسشىسى عيماراتقا تولىق تەحنيكالىق ساراپتاما جۇرگىزۋدى تاپسىردى.