ءۇش مىڭ دومبىرا جاساعان شەبەر: ءاربىر بولشەگىنە ءمان بەرەم

شيەلى. قازاقپارات - قىزىلوردا وبلىسى شيەلى اۋدانى دوسبول بي اۋىلىندا تۇراتىن ءبىرجان ءدىلمانوۆ جيىرما جىلدان استام ۋاقىتتان بەرى دومبىرا جاساۋ ىسىمەن اينالىسادى.

شەبەر بۇگىنگى كۇنگە دەيىن 3 مىڭنان استام دومبىرا جاساپ شىعارعان، دەپ حابارلايدى قازاقپارات ءتىلشىسى.

اكەسى قولونەر بۇيىمدارىن ازىرلەيتىن. ءبىرجان بالا كەزىنەن ول كىسىنىڭ شەبەرحاناسىنا ءجيى باس سۇعاتىن ەدى. العاشقى بۇيىمداردى مەكتەپتە وقىپ جۇرگەن كەزىنەن باستادى. قولونەرگە ەرەكشە قىزىعۋشىلىق بىلدىرگەن ءبىرجان بەرىدە الماتى قالاسىنداعى «شەرتەر» كومپانياسىندا بىلىكتىلىگىن ارتتىردى. مول تاجىريبە جينادى. وندا سەگىز جىلداي ەڭبەك ەتتى. بەرىدە قايتادان تۋعان توپىراققا ورالىپ، اتادان قالعان ونەردى ارداقتاي ءتۇستى.

قازىر ءبىرجان اعاشتان كوپتەگەن بۇيىمدارمەن جاساپ كەلەدى. دەگەنمەن قولى قالت ەتكەن ساتتە نەگىزگى كاسىبى - دومبىرا جاساۋعا بۇيرەگى بۇرادى. قازاق حالقىنىڭ كونەدەن جەتكەن ۇنىندە مۋزىكالىق اسپاپتى ەڭ قىسقا دەگەندە ون كۇندە ازىرلەيدى. كەيبىرى ءۇش ايعا دەيىن سوزىلادى.

«مەن دومبىرانى ۇيەڭكى، قايىڭ، پولەساندرا اعاشتارىنان ازىرلەيمىن. ەلىمىزدىڭ وزگە وڭىرلەرىنەن تاپسىرىس بەرەتىن ازاماتتار بار. دومبىرانى ولاردىڭ تاپسىرىس بەرۋىنە قاراي جاسايمىن. قۇرامالى، شاۋىپ تا جاسايتىن دومبىرالار بار»، - دەدى ءبىرجان ءدىلمانوۆ.

شەبەر بۇگىنگى كۇنگە دەيىن 3 مىڭنان استام دومبىرا جاساپ شىققان ەكەن. كەزىندە اكەسىنەن ۇيرەنگەن ءتالىمىن قازىر شاكىرتتەرىنە ۇيرەتىپ كەلەدى. ءبىرجاننىڭ شەبەرحاناسىندا جاس ورەندەر ءجيى بوي كورسەتىپ جاتادى. ولار دا ءتۇرلى مۋزىكالىق اسپاپتار جاساۋعا كوڭىل بولەدى.

ونىڭ ايتۋىنشا، كوكىرەكتەن توگىلگەن كۇيگە ءتىل بىتىرەتىن دۇنيە - ساپالى جاسالعان دومبىرا ەكەنى بەلگىلى. سوندىقتان ونىڭ ءاربىر بولشەگىنە ماڭىز بەرىپ قاراۋ قاجەت. شەبەرلەردىڭ ءوزى دومبىرانى شەرتە بىلگەنى دۇرىس. سوندا عانا ساپالى دۇنيە شىعادى.

«شەبەر مۋزىكالىق ساۋاتتى بولعانى ارتىق ەمەس. ءبىز قازاقتىڭ مۋزىكالىق اسپابىنىڭ 52 ءتۇرىن بىلەمىز جانە سولاردىڭ بارلىعىن جاساي الامىز. اتاپ ايتساق، دومبىرانىڭ قۇراما، شابىلعان تۇرلەرى بار. قۇراستىرعان دومبىرا 5-6 كۇن ۋاقىتتى السا، شاۋىپ جاسايتىن دومبىرانىڭ دايىن بولۋى ون بەس كۇنگە سوزىلادى. جاس ەرەكشەلىككە دە ءمان بەرەمىز. التى جاسقا دەيىنگى بالالارعا كولەمى 32 سانتيمەترلى دومبىرا جاسالادى. التى مەن ون ەكى جاس ارالىعىنداعى ورەندەرگە 40 سانتيمەترلىگىن ازىرلەيمىز. ءبىز دومبىرادان باسقا قىلقوبىز، جەتىگەن، پريما قوبىز، باس دومبىرا، كونتراباس پريما جاسايمىز. سونداي- اق، حالىقتىڭ ومىرىنە قاجەتتى ساندىق، بەسىك، ەستەلىككە بەرەتىن دۇنيەلەردى قۇراستىرا بەرەمىز»، - دەدى قولونەر شەبەرى.

ول كەلەشەكتە جۇمىس اۋقىمىن كەڭەيتۋدى جوسپارلاپ وتىر. سوسىن شەبەرحانادا ەڭبەك ەتەتىن ادامدار سانىن ارتتىرۋعا كوڭىل بولمەكشى.