گاۋھار الىمبەكوۆانىڭ ءسىڭلىسى ءوز شىندىعىن ايتتى

 استانا. قازاقپارات - گاۋھار الىمبەكوۆانىڭ تۋىستارى ونىڭ كىنالى ەكەنىنە سەنبەيدى.

ءسىڭلىسى گۇلنار الىمبەكوۆانىڭ ايتۋىنشا، سازگەر اپكەسى باقىت نازاروۆادان العان 40 مىڭ دوللار اقشانى سول كۇيىندە ءبىر كومپانياعا تاپسىرعان. ءوزى دە الدانىپ قالعان.

بۇل تۋرالى 31 -ارنانىڭ «جۇلدىزدار جارقىرايدى» جوباسىندا ايتىلدى.

«كىناسى جوق. بۇل جەردە 1000 تەڭگە دە جەگەن جوق. ەگەر ول اقشانى جەيتىن بولسا، نەگە كولىك، باسپانا الىپ المايدى؟ ءيا بولماسا جاعدايىن جاساپ المايدى؟

گاۋھار جاي عانا اقشانى الدى، ۇلى تيمۋرمەن بىرگە كەڭسەگە تاپسىرادى. ءبىر كومپانياعا. بولدى. گاۋھاردىڭ مۇندا قاتىسى جوق. وردابايەۆا ءوزىنىڭ موينىنا الىپ وتىر عوي. - ءبىزدىڭ كومپانيا الدى، قۇجاتتار تىركەلدى، - دەدى. ءبىراق تۇبىنە كەلگەندە جالعان بولىپ تۇر عوي»، - دەپ اشىندى گۇلنار الىمبەكوۆا.

ال وتاندىق ەسترادا جۇلدىزدارى الىمبەكوۆاعا كومەك كورسەتۋ ءۇشىن اقشا جيناۋعا كىرىسكەن. ءىستى قولعا العان اقبوتا كەرىمبەكوۆا ءوز اتىنان شوت اشىپ، رەكۆيزيتتەرىن الەۋمەتتىك جەلىدە جاريالادى.

بەلگىلى پروديۋسەر ەرعالي ءابدىرايىموۆتىڭ ايتۋىنشا، تانىمال تۇلعالار ەكى كۇن ىشىندە 900 دوللار اقشا جيناعان. ال ماقسات بازاربايەۆ الەۋمەتتىك جەلىدە اۋزىنا كەلگەنىن جازاتىن وقىرمانداردى سابىرعا شاقىردى.

«تەلەفوننىڭ ارتىندا وتىرعاندار باسقاشا پىكىر ءبىلدىرىپ جاتىر. ول ادامدارعا سابىر بەرسىن، باستارىنا كەلمەسىن مۇنداي»، - دەيدى ول.

«ونەر ادامدارى 50 مىڭنان بولسا دا، 100 مىڭنان بولسا دا، اركىم شاما-شارقىنشا جيناپ بەرۋگە دايىنبىز»، - دەيدى اقبوتا كەرىمبەكوۆا.

ەسكە سالا كەتەيىك، گاۋھار الىمبەكوۆانىڭ الاياقتىق ءۇشىن 6 جىلعا باس بوستاندىعىنان ايىرىلعانى بەلگىلى بولدى. وتاندىق جۇلدىزدار سوتتالعان الىمبەكوۆاعا قولداۋ ءبىلدىردى.

كەيىننەن الىمبەكوۆانىڭ ەلباسىدان اراشا سۇراپ، حات جازعانى انىقتالدى. ال كۇنى كەشە سازگەردى سوتقا بەرگەن باقىت نازاروۆا ءوز شىندىعىن ايتىپ، ونى تۇرمەگە جابۋدى ويلاماعانىن، تەك اقشاسىن قايتارعىسى كەلەتىنىن جەتكىزدى.

سونداي-اق، الىمبەكوۆانىڭ تەمىر توردىڭ ار جاعىنان حالىققا جولداعان حاتى جاريالاندى.