اكتريسا قازا تاپقان جول اپاتى: جۇرگىزۋشىنىڭ كىناسى دالەلدەندى

الماتى. قازاقپارات - الماتى پوليتسياسى اباي جانە سەيفۋللين داڭعىلدارىنىڭ قيىلىسىندا ءۇش ادامنىڭ ءومىرى قيىلعان جول اپاتىنا قاتىستى سوتقا دەيىنگى تەرگەپ-تەكسەرۋ اياقتالعانىن ءمالىم ەتتى، دەپ حابارلايدى قازاقپارات ءتىلشىسى.

«پروكۋراتۋرا تەكسەرىپ بولعان سوڭ قىلمىستىق ءىس سوتقا بەرىلدى. تەرگەۋ بارىسىندا Gelandewagen ماركالى اۆتوماشينانى جۇرگىزگەن، 1985 -جىلى تۋعان ءىلياس كاردىڭ كىناسى تولىق دالەلدەندى»، - دەپ مالىمدەدى قالالىق پوليتسيا دەپارتامەنتىنىڭ باسپا ءسوز قىزمەتى.

پوليتسەيلەر دەرەگىنە سۇيەنسەك، جول اپاتىنىڭ الدىندا ءىلياس كار كاراوكە باردا سپيرتتى ىشىمدىك ىشكەن، ال وعان دەيىن جاندوسوۆ كوشەسىندەگى ءدامحانالاردىڭ بىرىندە وتىرعان. بۇدان تىس، ونىڭ سپيرتتى ىشىمدىك ىشكەنى تۋرالى ءدامحانا قىزمەتكەرلەرى كۋالىك بەرگەن.

«ءىلياس كار وقيعا ورنىنان جاياۋ قاشىپ كەتكەن. ول ءبىر جارىم كۇننەن كەيىن ۇستالدى. ق ر ادىلەت مينيسترلىگىنىڭ سوت ساراپتامالارى ينستيتۋتىندا سوت-حيميالىق ساراپتامالارىن جۇرگىزۋ ءۇشىن ونىڭ قانىنان سىناما العان. ساراپتاما ناتيجەلەرى بويىنشا ونىڭ قانىنان الكوگول تابىلماعان»، - دەيدى پوليتسەيلەر.

ءبىراق سوتقا جىبەرىلگەن ايىپتاۋ اكتىسىندە تەرگەۋ جولىمەن دالەلدەنگەن، ونىڭ ماس كۇيدە بولعانىن دالەلدەيتىن فاكت كورسەتىلگەن.

ەسكە سالا كەتەيىك، 29 -جەلتوقسان كۇنى بولعان جول اپاتىندا ءۇش ادام، سونىڭ ىشىندە بەلگىلى اكتريسا شولپان ەلگەزەكوۆا قايتىس بولعان. ءىس سوتقا 29 -قاڭتار كۇنى جىبەرىلدى. كەشە ءبىرقاتار ب ا ق قايتىس بولعانداردىڭ ءبىرىنىڭ تۋىسىنا سىلتەمە جاساپ، ساراپتاما كەزىندە Gelandewagen جۇرگىزۋشىسىنىڭ قانىنان الكوگول تابىلماعانىن حابارلاعان بولاتىن.

اۆتور: دانيار داۋىتاليەۆ