ەكسپو ءۇشىن سالىنعان ۇيلەردى قانشاعا ساتىپ الۋعا بولادى؟

استانا. قازاقپارات - «بايتەرەك ديەۆەلوپمەنت» ا ق باسقارما ءتوراعاسىنىڭ ورىنباسارى اسقاربەك وسەربايەۆ ەكسپو كورمەسىن وتكىزۋ كەزىندە سالىنعان ۇيلەردىڭ باعاسىن ايتتى، دەپ حابارلايدى قازاقپارات ءتىلشىسى.

«ەكسپو اۋماعىندا ورنالاسقان كوپپاتەرلى تۇرعىن ءۇي كەشەنىندەگى باسپانالاردىڭ شارشى مەترىنىڭ قۇنى ساتىپ الۋدىڭ تاڭدالعان ادىسىنە بايلانىستى وزگەرمەيدى. ياعني، تۇرعىن ۇيلەردىڭ 1 شارشى مەترى 399900 تەڭگەنى، ال كولىك ورنى 735000 تەڭگەنى قۇرايدى»، - دەدى اسقاربەك وسەربايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

حابارلانىپ وتىرعانداي، ءبىر بولمەلى پاتەرلەردىڭ اۋماعى 39,6 دان 51 شارشى مەتر، ەكى بولمەلىلەر 57,1-80,6 شارشى مەتر، ءۇش بولمەلىلەر 81,1- 106 شارشى مەتر، ءتورت بولمەلىلەر 105-123,4 شارشى مەتر ارالىعىندا.

«تۇرعىن ءۇي جايلىلىقتىڭ Ⅱ ساناتىنا ساي كەلەدى جانە تازا ارلەنگەن كۇيدە وتكىزىلەدى»، - دەدى ول.

ايتا كەتسەك، وتاندىق جانە شەتەلدىك دەلەگاتسيالاردى ورنالاستىرۋ ءۇشىن «ەكسپو-2017» كورمە-كەشەنىنىڭ اۋماعىندا كوپقاباتتى 42 ءۇي سالىنعان بولاتىن. بۇگىنگە دەيىن ولاردان 148 پاتەر مەن 103 كولىك ورنى ساتىلىپ كەتتى. جىلجىمايتىن مۇلىكتى ساتىپ الۋعا Digital Baiterek ونلاين-پلاتفورماسى ارقىلى بارلىعى 1547 ءوتىنىم كەلىپ تۇسكەن.

ەسكە سالساق، 2018-جىلدىڭ 16- قاڭتارىنان باستاپ كورمە اۋماعىنداعى جىلجىمايتىن مۇلىكتى ساتىپ الۋعا وتىنىمدەردى قابىلداۋ ۋاقىتشا توقتاتىلعان ەدى.

بۇگىن اسقاربەك وسەربايەۆ پاتەرلەردى ساتۋ قايتا باستالعانىن جانە ولاردى يەلەنۋدىڭ شارتتارىن اتادى.