ترامپ ا ق ش بارلاۋ قىزمەتىنىڭ تۇجىرىمىمەن كەلىسپەيدى
بۇدان بۇرىن ا ق ش كونگرەسى سەناتىندا بارلاۋ قىزمەتىنىڭ باسشىلارى سولتۇستىك كورەيادان ءالى قاۋىپ بارىن، ال يران يادرولىق باعدارلاماسىن توقتاتۋ تۋرالى كەلىسىمگە ساي يادرولىق قارۋ جاساۋ جۇمىسىن دوعارعانىن حابارلاعان. امەريكالىق بارلاۋ قىزمەتىنىڭ قورىتىندىسى ا ق ش پرەزيدەنتىنىڭ باعالاۋىنا مۇلدەم قايشى كەلەدى.
«بارلاۋ قىزمەتىنىڭ باسشىلالى يراننان تونەتىن قاۋىپتى باعامداۋدا وتە ەنجار كورىنەدى. ولار قاتەلەسەدى» دەپ جازدى دونالد ترامپ Twitter- دەگى پاراقشاسىندا. ترامپ يراننىڭ زىمىران سىناعانىن ەسكە سالىپ، تەگەراننىڭ «قاۋىپتى مەجەگە تىم جاقىن كەلگەنىن» مالىمدەدى. «بالكىم، بارلاۋ قىزمەتكەرلەرىنە ءالى ءبىراز وقىپ- ۇيرەنۋ كەرەك شىعار» دەدى پرەزيدەنت.
ا ق ش بىلتىر الەمدىك دەرجاۆالاردىڭ تەگەرانمەن جاساسقان يادرولىق كەلىسىمىنەن شىعىپ، يرانعا جاڭا سانكسيا سالعان. دونالد ترامپ ول كەزدە تەگەران «كەلىسىم تالاپتارىن ورىنداماي وتىرعانىن» مالىمدەگەن. يران 2015 -جىلى جاسالعان كەلىسىم بويىنشا يادرولىق باعدارلاماسىن توقتاتىپ، ال حالىقارالىق قاۋىمداستىقتىڭ بۇل ەلگە سالعان سانكسياسى جويىلعان ەدى.
ا ق ش بارلاۋ قىزمەتىنىڭ باسشىلارى سەناتتا سونىمەن قاتار «يسلام مەملەكەتى» ەكسترەميستىك ۇيىمى ا ق ش- قا ءالى قاۋىپ ءتوندىرىپ وتىرعانىن مالىمدەگەن. ال ترامپ بۇعان دەيىن «يسلام مەملەكەتى» ەندىگى كۇيرەگەنىن بىرنەشە رەت مالىمدەگەن.