باقىتجان ساعىنتايەۆ حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونسپەن كەزدەستى
كەزدەسۋ بارىسىندا ۇكىمەت باسشىسى مەن حالىقارالىق كوميتەتتىڭ پرەزيدەنتى قازاقستاندا جانە الەمدەگى پاراسپورتتىڭ بۇگىنگى جاي-كۇيى مەن ونىڭ بولاشاق دامۋى تۋرالى ايتىلدى.
سونداي-اق، ۇستىمىزدەگى جىلدىڭ 12 - 20- شىلدە ارالىعىندا استانادا وتەتىن پارا پاۋەرليفتينگتەن الەم چەمپيوناتىن وتكىزۋ مەن وعان دايىندىق بارىسى قارالدى. ايتا كەتۋ كەرەك، جازعا جوسپارلانىپ وتىرعان پارا پاۋەرليفتينگ چەپيوناتى ەلىمىزدىڭ پاراسپورت تاريحىنداعى العاش رەت وتكەلى وتىرعان حالىقارالىق شارا.
ودان سوڭ، قۇرمەتتى قوناق قالاداعى 83№ ورتا مەكتەپتە بولىپ، «I'mPOSSIBLE» حالىقارالىق جوباسى اياسىندا جۇزەگە اسىرىلىپ جاتىرعان ينكليۋزيۆتى سىنىپ وقۋشىلارىمەن كەزدەستى. مەكتەپتەگى ينكليۋزيۆتى ءبىلىم بەرۋ جۇمىسىمەن تانىسا كەلە، بالالاردىڭ وتىرىپ ويناۋدان ۆولەيبول جانە گولبولدان ويىندارىن تاماشالادى.
ال تۇسكەن كەيىن حالىقارالىق پاراليمپيادا كوميتەتىنىڭ باسشىسى استانا قالاسىنىڭ اكىمى باقىت سۇلتانوۆپەن، ۇلتتىق پاراليمپيادا كوميتەتىنىڭ پرەزيدەنتى قايرات بورانبايەۆپەن، ۇلتتىق پاراليمپيادا كوميتەتىنىڭ باس حاتشىسى دياس سۇلەيمەنوۆپەن جانە ۇلتتىق پاراليمپيادا كوميتەتىنىڭ اتقارۋشى ديرەكتورى ەرلان سۇلەيمەنوۆپەن كەزدەسۋ وتكىزدى.
جۇزدەسۋدە باس قالادا پاراسپورت ءۇشىن مۇمكىندىك جاسالۋ جاعدايى مەن اكىمدىك تاراپىنان جازدا وتەتىن پارا پاۋەرليفتينگ چەمپيوناتىنا قولداۋ كورسەتۋ ماسەلەلەرى تالقىلاندى.
ودان بولەك، ە. پارسونس مادەني باعدارلاما اياسىندا ەلورداداعى «نۇر-الەم» مۋزەيىنە باردى.
ايتا كەتسەك، حالىقارالىق پاراليمپيادا كوميتەتى الەمدىك دەڭگەيدەگى بارلىق پاراسپورتتىق شارالاردى وتكىزۋ مەن باسقارۋعا جاۋاپتى. اتالعان ۇيىمنىڭ قۇرامىنا الەمنىڭ 180 ۇلتتىق پاراليمپيادالىق كوميتەتى كىرەدى، ونىڭ ىشىندە ءبىزدىڭ ۇلتتىق پاراليمپيادالىق كوميتەت تە بار.
ەسكە سالساق، كەشە استاناعا العاش رەت حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونستىڭ رەسمي ساپارمەن كەلگەنىن حابارلاعان بولاتىنبىز.