داۋرەن ابايەۆ: نەسيە بەرۋدەگى قىراعىلىق نارىقتى ءبىر كۇندىك كومپانيالاردان تازارتادى

استانا. قازاقپارات - «حابار» تەلەارناسىنداعى «اشىق ديالوگ» باعدارلاماسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ مەملەكەت باسشىسىنىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا ەلىمىزدىڭ ىلگەرى دامۋىنا ناقتى باعىت-باعدار بەرىلگەنىن ءمالىم ەتتى، دەپ حابارلايدى قازاقپارات ءتىلشىسى.

«پرەزيدەنت ءوز سوزىندە ەكى كورسەتكىشتى ەرەكشە اتاپ ءوتتى. ياعني، ەلباسى مەملەكەت جۇمىسىنىڭ تيىمدىلىگىنىڭ باستى كريتەرييى رەتىندە تابىس جانە ءومىر ساپاسىن باسا ايتتى. وسىناۋ ءسوزدىڭ ىشىندە مەملەكەت باسشىسىنىڭ باستى تالابى دا ايقىندالىپ وتىر. سول سەبەپتى، نەگىزگى نازار ەكونوميكالىق بلوك پەن ايماقتاردىڭ دامۋىنا اۋدارىلدى. مەملەكەت باسشىسىنىڭ بيزنەستى نەسيەلەۋ جۇمىسىنا ماڭىز بەرۋىنە ەرەكشە توقتالۋعا بولادى. بۇل دەگەنىڭىز، بۇدان بىلاي نەسيە ءوزىنىڭ لايىقتى ءال-اۋقاتىن كورسەتە الاتىن كومپانيالارعا عانا بەرىلەدى دەگەن ءسوز. شىنىندا دا، بۇل ەكونوميكانىڭ ناقتى سەكتورىن ءبىر كۇندىك كومپانيالاردان تازارتادى»، - دەدى داۋرەن ابايەۆ حابار ارناسىنداعى «اشىق ديالوگ» باعدارلاماسىندا.

مينيستر سونىمەن بىرگە ەلباسى ۇكىمەت پەن جەرگىلىكتى اتقارۋشى ورگاندارعا جەكە ءوندىرىس سالاسىنا باسا ماڭىز بەرۋدى جۇكتەگەنىن ايتتى.

«ءبىزدىڭ مەملەكەتتە رەسۋرستار دا، كادرلار دا، قارجىلاندىرۋ دا بار. ماسەلەن، 2019-جىلى 13 ميلليون شارشى مەتر تۇرعىن ءۇي سالۋ كوزدەلۋدە. قازىردىڭ وزىندە قۇرىلىستاعى قازاقستاندىق قۇرامنىڭ ۇلەسى 77 پايىزدى قۇرايدى. بۇل كورسەتكىشتى دەگەنمەن ءوسىرۋ كەرەك. كەلەسى مىسال - اۋىل شارۋاشىلىعى. بۇل سالادا بىزدە وراسان زور باسەكەگە قابىلەتتى ارتىقشىلىق بار. ءومىرزاق ەستاي ۇلىنىڭ بايانداماسى (شوكەيەۆ - اۆت.) قاي باعىتقا قاراي قوزعالۋ كەرەكتىگىن كورسەتىپ بەردى. ەڭ الدىمەن، سيفرلىق تەحنولوگيالار ارقىلى بەلسەندى تۇردە ناقتى جەر ءبولىنىسى سالاسى داميتىن بولادى. قازىردىڭ وزىندە اۋىل شارۋاشىلىعى پوليگوندارى جوعارى ونىمدىلىكتى كورسەتۋدە. سونىمەن بىرگە، يگەرىلەر جەردىڭ اۋقىمىن ارتتىرۋ جوسپارلانعان»، - دەدى ول.

ءمينيستردىڭ ايتۋىنشا، پرەزيدەنت قازاقستانداعى اۋىلدار ەكونوميكالىق دامۋدان شەت قالماۋى كەرەكتىگىن ايقىن ۇقتىرعان.

«مىنە، سوندىقتان اۋىلداردى تازا اۋىز سۋمەن، ساپالى جولدارمەن جانە جاڭا جۇمىس ورىندارىمەن قامتاماسىز ەتۋ ماسەلەلەرى كوتەرىلدى. جالپى، مەملەكەت باسشىسىنىڭ تاپسىرمالارىن تالداي وتىرىپ، ۇكىمەتكە ارى قاراي دامۋ داڭعىلىنا انىق باعىت-باعدار بەرىلگەنىن، تيىمدىلىكتىڭ ناقتى ينديكاتورلارى قويىلعانىن اتاپ وتۋگە بولادى. ول ينديكاتورلاردىڭ ەڭ نەگىزگىلەرىنىڭ ءبىرى - حالىقتىڭ جاسالعان جۇمىستارعا كوڭىلىنىڭ تولۋى»، - دەدى داۋرەن ابايەۆ.

ەسكە سالا كەتسەك، كەشە ۇكىمەت ۇيىندە ق ر پرەزيدەنتى نۇرسۇلتان نازاربايەۆتىڭ توراعالىعىمەن ۇكىمەتتىڭ كەڭەيتىلگەن قۇرامداعى وتىرىسى وتكەن بولاتىن.