تۇركىستاندا ياساۋي تۋرالى تەلەحيكايا تۇسىرىلەدى

تۇركىستان. قازاقپارات - تۇركىستاندا «احمەت ياساۋي» تەلەحيكاياسى، «ءال- فارابي» كوركەم فيلمى جانە «قامبار باتىر» ، «ساۋران قالاشىعى» انيماتسيالىق فيلمدەرىن ءتۇسىرۋ جوسپارلانىپ وتىر، دەپ حابارلايدى قازاقپارات.

بۇل تۋرالى وبلىستىق مادەنيەت جانە تىلدەردى دامىتۋ باسقارماسى باسشىسىنىڭ مىندەتىن اتقارۋشى اسىلحان تەمىرحان وبلىس اكىمى جانسەيىت تۇيمەبايەۆقا 2018 -جىلعى اتقارعان جۇمىستارى جونىندە ەسەپ بەرۋ كەزىندە باياندادى.

ونىڭ ايتۋىنشا، وڭىردە 678 مادەنيەت جانە ونەر مەكەمەسى حالىققا مادەني قىزمەت كورسەتەدى.

«وبلىس ورتالىعى تۇركىستان قالاسىنا كوشىرىلۋىنە بايلانىستى 12 وبلىستىق مادەنيەت جانە ونەر مەكەمەسى شىمكەنت قالاسىنا بەرىلدى. ياعني، 5 تەاتر، 3 كىتاپحانا، 2 مادەني ورتالىق، 1 مۋزەي، 1 سيرك. ال، وبلىستاعى مادەني وشاقتاردىڭ ماتەريالدىق- تەحنيكالىق بازاسىن نىعايتۋ ءۇشىن 117 ميلليون 741 مىڭ تەڭگە قارجى قارالدى. وعان اۆتوكولىك، ساحنالىق كيىمدەر باسقا دا قۇرال- جابدىقتار ساتىپ الىندى» ، - دەدى اسىلحان تەمىرحان.

2018 -جىلى ايماقتا وتاندىق جانە الەمدىك مادەنيەت تۋىندىلارىنا قولجەتىمدىلىگىن قامتاماسىز ەتۋ ماقساتىندا 29 967 ءىس- شارا ۇيىمداستىرىلعان. وتكىزىلگەن شارالار نەگىزىنەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جانە استانانىڭ 20 جىلدىعىنا وراي وتكىزىلدى.

 بۇدان وزگە، «وڭتۇستىكفيلم» مەكەمەسى مەن «ساق» كينوستۋدياسى ەلباسىنىڭ باعدارلامالىق ماقالاسى اياسىندا ءبىرقاتار جوبالاردى جۇزەگە اسىردى. اتاپ ايتقاندا، «ورداباسى بىرلىكتىڭ تۋى» ، «و ق س ى ز» ، «تۇركىستان» انيماتسيالىق فيلمدەرىن جانە «تولە بي» اتتى 10 سەريالى تاريحي تەلەحيكاياسىن تاسپالاندى.

سونداي- اق، وتكەن جىلى تۇسىرىلگەن «كۇش اتاسى - قاجىمۇقان» ، «كيەلى قازىعۇرت» ، «وتىراردى قورعاۋ» انيماتسيالىق فيلمدەرى مەن «كونە جەتىگەننىڭ سىرى» تەلەحيكاياسى جەرگىلىكتى جانە رەسپۋبليكالىق تەلەارنالارىنان كورسەتىلدى. سونىمەن قاتار، بيىل مەملەكەت باسشىسىنىڭ «ۇلى دالانىڭ جەتى قىرى» ماقالاسى اياسىندا «احمەت ياساۋي» تەلەحيكاياسىن، « ءال- فارابي» كوركەم ءفيلمىن جانە «قامبار باتىر» ، «ساۋران قالاشىعى» انيماتسيالىق فيلمدەرىن ءتۇسىرۋ جوسپارلانعان.

وتكەن جىلى اتقارىلعان شارۋالار جانە جۇمىس جوسپارىمەن تانىسقان ايماق باسشىسى باسقارما باسشىسىنا ءبىرقاتار تاپسىرمالار جۇكتەدى. اتاپ ايتقاندا، ق. ا. ياساۋي كەسەنەسىندە جاتقان تۇلعالاردىڭ ءتىزىمى، ءومىربايانى مەن تاريحي دەرەكتەرى جانە تۇركىستان قالاسى تۋرالى اقپارات جيناقتاپ، كىتاپ شىعارۋدى تاپسىردى. سونداي- اق، ءار سالا بويىنشا ەلباسىنىڭ «ۇلى دالانىڭ جەتى قىرى» ماقالاسىن جانە تۇركىستاندى تۇركى الەمىنىڭ رۋحاني ورتالىعىنا اينالدىرۋ ماقساتىندا مادەني- بۇقارالىق ءىس- شارالار ۇيىمداستىرۋ كەرەكتىگىن ايتتى.

ەسكە سالا كەتسەك، 2017 -جىلى تۇرىك كينەماتوگرافيستەرى ياساۋي، قورقىت تۋرالى فيلم ءتۇسىرۋدى ۇسىنعان ەدى.