استانادا وتاندىق جاڭا فيلمنىڭ تۇساۋكەسەرى ءوتتى

استانا. قازاقپارات - استانادا «قازاق فيلم» كينوستۋدياسى تۇسىرگەن رەجيسسەر فارحات ءشارىپوۆتىڭ «تۇلعالىق ءوسۋ ترەنينگى» («ترەنينگ ليچنوستنوگو روستا») اتتى فيلمنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى «قازاق فيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.

ق ر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن الەۋمەتتىك دراما جاسى 40 قا كەلىپ، ورتا جاس كۇيزەلىسىن كەشىپ جۇرگەن بانك قىزمەتكەرى تۋرالى باياندالادى. كينوتۋىندى جازۋشى دانيار سۇگىرالينوۆتىڭ «كىرپىشتەر 2.0» رومانىنىڭ جەلىسى بويىنشا تۇسىرىلگەن.

تۇساۋكەسەر شاراسىنا ق ر مادەنيەت جانە سپورت ءمينيسترى ارىستانبەك مۇحامەدي ۇلى، «قازاق فيلم» كينوستۋدياسىنىڭ ءبىرىنشى ۆيتسە-پرەزيدەنتى سەرىك جۇباندىقوۆ، فيلم رەجيسسەرى فارحات ءشارىپوۆ جانە قويۋشى وپەراتورى الەكساندر پلوتنيكوۆ قاتىستى.

«قازاق فيلم» كينوستۋدياسىنىڭ بيىلعى پروكاتتىق ماۋسىمى جاس رەجيسسەر فارحات ءشارىپوۆ تۇسىرگەن «ترەنينگ ليچنوستنوگو روستا» («تۇلعالىق ءوسۋ ترەنينگى») فيلمىمەن اشىلىپ وتىر. بۇل كينوتۋىندى كورەرمەنگە وي سالاتىن، استارلى كارتينا. كينودا باستى رولدەردى ەلىمىزگە تانىمال كينو جانە تەاتر اكتەرلەرى سومداعان. بۇل اكتەرلەر ناعىز سۋرەتكەرلەر. ولاردىڭ جاساعان وبرازدارى ەشكىمدى دە بەي-جاي قالدىرمايدى، - دەدى مينيستر ارىستانبەك مۇحامەدي ۇلى.

سونداي-اق، مەرەكەلىك كەشكە كوپكە بەلگىلى ونەر جانە قوعام قايراتكەرلەرى مەن كينو سالاسى ماماندارى قاتىستى.

«بالكىم، جاس بۋىنعا ءفيلمنىڭ درامالىق نەگىزىن ءتۇسىنۋ قيىنعا سوعاتىن شىعار. كارتينا ومىرلىك تاجىريبەسى بار، كوپ نارسەنى باسىنان كەشكەن ادامدارعا ۇعىنىقتى. ايتپاعىم، جاس كورەرمەن كەيىپكەردىڭ قارتايعان اناسىنا قاراۋى، وتباسى قۇردىمعا كەتىپ بارا جاتقانىنا ۋايىمداۋى جانە جاس ءوسپىرىم قىزىمەن ءتىل تابىسا الماۋى سەكىلدى ماسەلەلەردى تولىق ۇعىنباۋى مۇمكىن. مەن ءۇشىن ءفيلمدى كورگەن كورەرمەن، ودان وزىنە كەرەگىن السا سول جەتكىلىكتى، - دەدى فيلم رەجيسسەرى فارحات ءشارىپوۆ.

حابارلامادا ايتىلعانداي اتالعان فيلمنىڭ الەمدىك تۇساۋكەسەرى 23 پۋسان حالىقارالىق كينوفەستيۆالىندە وتكەن. سونىمەن قاتار، كارتينانىڭ قورجىنىندا ەكى بىردەي جۇلدە بار، ءبىرى 14-حالىقارالىق شاكەن ايمانوۆ كينوفەستيۆالىندە قازىلار القاسىنىڭ ارنايى جۇلدەسى جانە نەتپاك جۇلدەسى («ار الدىندا تاڭداۋ جاساعان ادامنىڭ بەينەسىن استارلى كورسەتكەنى ءۇشىن»).

بۇگىننەن باستاپ وتاندىق پروكاتقا شىعاتىن كينوتۋىندى الماتىدا تۇسىرىلگەن. باستى ءرولدى دۋلىعا اقمولدا مەن ەرجان ءتۇسىپوۆ سومدايدى، سونداي-اق گۇلجامال قازاقبايەۆا، اسەل قاليەۆا، فيليپپ ۆولوشين جانە باسقا دا اكتەرلەر وينايدى.