قورعاس شەكاراسىندا يەسىز جاتقان «التىن ينەلەر» تابىلدى

استانا. قازاقپارات - قورعاس شەكارا جاساعىنىڭ اۋماعىنداعى حالىقارالىق شەكارا بويى ىنتىماقتاستىعى ورتالىعىن شولىپ ءجۇرىپ، شەكاراشىلار قازاقستانعا قاراي شىعا بەرىستە جالپى سالماعى 45 كەلىگە جۋىق يەسىز زاتتار تاۋىپ العان، دەپ حابارلايدى قازاقپارات ق ر ۇ ق ك ش ق باسپا ءسوز قىزمەتىنە سىلتەمە جاساپ.

بۇل جولى تابىلعان زاتتار ادەتتەگىدەي ءدارى-دارمەك ەمەس، ءبىراق قىتاي ەم-دومىنا كەرەك-جاراق دۇنيەلەر ەكەن. اتاپ ايتقاندا - ىستىق بالاۋىز، سونىمەن بىرگە، «التىن ينەلەر». جۇكتىڭ 10 كەلىگە جۋىعى باس جۋاتىن سابىنسۋلار بولىپ شىقتى.

تابىلعان زاتتار اكتىلەنىپ، التىنكول كەدەن بەكەتىنە تاپسىرىلدى.

سونداي-اق پەتروپاۆل شەكارا جاساعىنىڭ «قاراقوعا-اۆتو» وتكىزۋ بولىمشەسىندە 2003-جىلى شىعارىلعان «سۋبارۋ لەگاسي» اۆتوكولىگىمەن رەسەيدەن كەلە جاتقان 1987-جىلعى قازاقستاندىق ۇستالدى. بۇعان سەبەپ - اۆتوكولىكتىڭ ۇرلانعاندىعىنان حابار بەرەتىن بەلگىلەر. دالىرەك ايتساق، شاناق ءنومىرىنىڭ تىركەۋ تۋرالى كۋالىكتە كورسەتىلگەن مالىمەتتەرمەن سايكەس كەلمەۋى. ۇستالعان ازامات اۆتوكولىگىمەن بىرگە م. جۇمابايەۆ اۋدانىنىڭ پوليتسيا بولىمىنە تاپسىرىلدى.