ديماش پەن دانەليا امەريكالىقتاردى قايران قالدىردى - پروديۋسەر گاۋھار نۇرتاس
ساناۋلى كۇندەردەن كەيىن CBS تەلەارناسىندا The World's Best جاھاندىق تالانتتار شوۋى باستالادى. وعان قازاقستان اتىنان ديماش پەن دانەليا العاش رەت قاتىسادى. سونىمەن بىرگە، ءادىل قازى القاسىنىڭ قۇرامىندا قازاقستاندىق پروديۋسەر، رەجيسسەر Hollywood Film Academy ® كومپانياسىنىڭ نەگىزىن قالاۋشى گاۋھار نۇرتاس بار.
ۇمىتكەرلەردى باستى ءۇش تورەشى - دريۋ بەرريمور، رۋ پول جانە فەيت حيلل، سونىمەن بىرگە حالىقارالىق ساراپشىلار توبى باعالايدى. وتانداسىمىز گاۋھار نۇرتاس ءدال وسى حالىقارالىق توپتىڭ قۇرامىنا ەنگەن.
گاۋھاردىڭ ايتۋىنشا، جوبا ءتۇسىرىلىمى ءالى جالعاسۋدا، العاشقى 10 ەپيزود 3 اقپاننان باستاپ CBS تەلەارناسىندا كورسەتىلە باستايدى.
«CBS تەلەارناسى كاسىبي تاجىريبەسى بار، ساراپشى بولا الاتىن ادامدارعا ىزدەۋ سالدى. شوۋ ۇيىمداستىرۋشىلارى قازاقستان كونسۋلدىعىنا حابارلاسقاندا مەنىڭ اتى- ءجونىمدى ەستىگەن. جوبا تۋرالى اقپارات ەشكىمگە ايتىلماعان. شوۋ بولاتىنىن ەشكىم بىلگەن جوق. كۇتپەگەن جەردەن ۇيىمداستىرۋشىلار ماعان حابارلاسىپ، جوباعا 50 ساراپشىنىڭ ءبىرى رەتىندە قازاقستان اتىنان قاتىسۋدى ءوتىندى» ، - دەيدى گاۋھار نۇرتاس.
بۇعان دەيىن گ. نۇرتاس تەليەۆيزيالىق جوبادا قازىلىق ەتىپ كورمەگەن. الايدا، ول اۋقىمدى جوبالار مەن فەستيۆالدەرگە پروديۋسەرلىك ەتكەنىن، قازىلار القاسىن تاڭداۋدا تاجىريبەسى بار ەكەنىن اتاپ ءوتتى.
«ءبىراز جىلدان بەرى امەريكادا تۇرامىن جانە دانەليا مەنى تاڭ قالدىردى. ونىڭ كاسىبي دەڭگەيى جوعارى جانە داۋسى زور. دانەليا بولاشاقتا ۇلكەن جۇلدىزعا اينالادى. بارلىق ساراپشىلار وسىنداي پىكىر ايتتى. ديماشقا كەلسەك، ونى ءبارى تانيدى، جاقسى كورەدى. ديماشتى جاندى داۋىستا تىڭداعان ءتىپتى اسەرلى ەكەن. كورەرمەندەرگە ونىڭ تالانتى ەرەكشە ۇنادى» ، - دەدى ول.
گاۋھار نۇرتاس امەريكادا ۇزاق جىل تۇرىپ، قازاقستان تۋرالى دۇرىس كوزقاراس قالىپتاستىرۋعا تىرىسقانىن جەتكىزدى.
«ەلىمىزدى تانىتاتىن ۇلكەن مۇمكىندىك تۋدى. ەندى الەم جۇرتشىلىعى قازاقستاندى تالانتتار ەلى رەتىندە تانيدى» ، - دەيدى پروديۋسەر.
سونىمەن بىرگە، ول الداعى جوسپارلارىمەن ءبولىسىپ، جاڭا جوبالارى جونىندە ايتىپ بەردى. امەريكالىق تالانتتار شوۋىنان بولەك، گ. نۇرتاس موڭعوليامەن بىرلەسىپ، ەكشن- فيلمگە پروديۋسەرلىك ەتۋدە. اتالعان فيلم بيىل قازاقستاندىق كينوپروكاتقا شىعادى.