وپپوزيتسيا جەتەكشىسىن قولدايتىن ا ق ش تاراپى ەلگە ءوز اسكەرىن كىرگىزۋى مۇمكىن. الەمدىك اقپارات قۇرالدارى اق ءۇيدىڭ استىرتىن ارەكەتىن اشكەرەلەدىك دەپ جار سالۋدا.
ساراپشىلاردىڭ ايتۋىنشا، جاعداي سوعىسقا دەيىن ۋشىعا قويماس. بۇل قادام اق ءۇي باسشىسىنىڭ استىرتىن ارەكەتى بولۋى مۇمكىن. كولۋمبياعا 5 مىڭ ا ق ش اسكەرىن جىبەرۋ. بۇل ۇلتتىق قاۋىپسىزدىك بويىنشا دونالد ترامپتىڭ كەڭەسشىسى دجون بولتوننىڭ قويىن داپتەرىندەگى جازۋ. داۋدىڭ باسى وسىدان تۇتاندى.
باسپاءسوز كونفەرەنسياسىندا ءسوز سويلەگەن بولتوننىڭ داپتەرىن جۋرناليستەر فوتوعا ءتۇسىرىپ العان. سەبەبى بۇعان دەيىن ساراپشىلار ءدال وسىنى بولجاعان ەدى. ياعني گۋايدونى قولدايتىن ا ق ش كولۋمبيا ارقىلى ۆەنەسۋەلاعا اسكەرىن كىرگىزۋى مۇمكىن. بۇل شىندىق پا، الدە بوپسالاۋ ما؟ كىم ءبىلسىن. دەسە دە ا ق ش تاراپى كولۋمبيالىقتارعا اسكەر جىبەرەتىنىن ايتۋدى ۇمىتىپ كەتكەن سىڭايلى.
كارلوس حولمس ترۋحيلو، كولۋمبيانىڭ سىرتقى ىستەر ءمينيسترى:
- دجون بولتوننىڭ قويىن داپتەرىندە كولۋمبيانىڭ نەگە جازىلىپ تۇرعانىنان حابارسىزبىز. ول مالىمدەمىنىڭ قانشالىقتى ماڭىزدى ەكەنىن دە بىلمەيمىز. كولۋمبيا بۇرىنعىداي قۇراما شتاتتارمەن سەنىمدى سەرىكتەستىگىن جالعاستىرا بەرمەك. بۇل كەرەمەت ۇلتپەن ءوزارا ىنتىماقتاستىعىمىز بەرىك.
ا ق ش اسكەر جىبەرەتىنىن رەسمي مالىمدەمەسە دە، ۆەنەسۋەلانىڭ مەملەكەتتىك مۇناي ءوندىرۋشى كومپانياسىنا قاتاڭ سانكسيا سالاتىندىعىن جاريالادى. «پەترولەس دە ۆەنەسۋەلانىڭ» 7 ميلليارد دوللاردى قۇرايتىن اكتيۆى بۇعاتتالدى. اق ءۇي اكىمشىلىگىنىڭ ەسەپتەۋىنشە، تاسىمالعا قويىلعان شەكتەۋدەن مۇناي وندىرەتىن كاسىپورىن 11 ميلليارد دوللار كولەمىندە شىعىنعا باتادى.
بولتون: «بۇل ۆەنەسۋەلانىڭ بولاشاعى ءۇشىن جاسالىپ وتىر»، - دەيدى. ال قارسى تاراپ سانكتسيا زاڭسىز ارەكەت دەپ اشۋعا بۋلىقتى.
مانۋەل كيەۆەدو، ۆەنەسۋەلانىڭ مۇناي ءمينيسترى، PDVSA باسشىسى:
- ا ق ش تاراپى وسىعان دەيىن Citgo كومپانياسىن باسىپ الماق بولىپ كەلدى. ال بۇگىن وپپوزيتسيا تاراپىنىڭ اكسيالارى ارقىلى وسىنداي قادامعا بارماقشى. بۇل بارىپ تۇرعان توناۋشىلىق.
نيكولاس مادۋرو، ۆەنەسۋەلا پرەزيدەنتى:
- ا ق ش سانكسياسى زاڭسىز ارەكەت. ءبىرجاقتى تاراپتا قابىلدانعان. ولار وسىلايشا ەل ءۇشىن ماڭىزى بار كومپانيانى تارتىپ الماق. اباي بول، ۆەنەسۋەلا! دونالد ترامپ، ۆەنەسۋەلادان اۋلاق ءجۇر!
ايتا كەتەيىك، ەلدەگى الەۋمەتتىك داعدارىس نيكولاس مادۋرونىڭ قايتا پرەزيدەنتتىككە تاعايىندالۋىنان تۋىندادى. وپپوزيتسيا سايلاۋدى ادىلەتسىز ءوتتى دەپ حۋان گۋايدونى قولدادى. 35 جاستاعى ساياساتكەر 23 - قاڭتار كۇنى ءوزىن- ءوزى پرەزيدەنت ەتىپ جاريالادى. ىزىنشە ەلدە ەرەۋىلدەر باستالدى. سالدارىنان 35 ادام قازا تاۋىپ، 850 تۇرعىن تەمىر تورعا قامالعان.
ءبىر قازانعا ەكى قوشقاردىڭ باسى سىيمايتىنى انىق. ا ق ش جانە ەۋروپا ەلدەرى گۋايدونى قولداسا، رەسەي، قىتاي، تۇركيا جانە سولتۇستىك كورەيا مادۋرونى جاقتاپ وتىر.
سەرگەي لاۆروۆ، ر ف سىرتقى ىستەر ءمينيسترى:
- ا ق ش جانە ونىڭ جاقتاستارى ۆەنەسۋەلاداعى باسقارۋشى بيلىكتى قۇلاتۋ ءۇشىن حالىقارالىق نورمالاردى بۇزىپ جاتىر. بۇل سانكسيا زاڭسىز سالىنىپ وتىر. وپپوزيتسيا تاراپىنان شىققان كوشباسشى ا ق ش- تىڭ بۇيرىعىمەن ەل ساياساتىن جۇرگىزبەك. ءبىز بارلىق سەرىكتەستەرمەن بىرگە قازىرگى بيلىكتىڭ ورنىندا قالۋ ءۇشىن قولدان كەلگەندى جاسايمىز.
ەكى پرەزيدەنتى بار ەلدىڭ تاعدىرى قالاي شەشىلەتىنى ۋاقىت ەنشىسىندە. ازىرگە دجون بولتوننىڭ قويىن داپتەرىندەگى جازۋ ساراپشىلار تاراپىنان قىزۋ تالقىعا ءتۇسىپ جاتىر.
دجوفف رامسي، لاتىن امەريكا بويىنشا ساراپشى:
- ۆەنەسۋەلاعا اسكەريلەردىڭ باسىپ كىرۋىنىڭ سوڭى نەگە اكەلەتىنىنەن اق ءۇي اكىمشىلىگى حاباردار دەپ ويلايمىن. ءتىپتى ا ق ش تاراپى بوپسالاعىسى كەلدى دەگەن دە اقىلعا سىيمايدى. بۇل قادام ماسەلەنى شەشپەيدى، كەرىسىنشە، كۇردەلەندىرە تۇسپەك.
ميحايل بەليات، لاتىن امەريكا بويىنشا ساراپشى:
- ۆاشينگتون كاراكاسپەن تىكەلەي سوعىسقا تۇسەدى دەپ ايتا المايمىن. ۆەنەسۋەلا اسكەرى مادۋرونى قولداپ وتىر. ولار قارۋلانعان، ءتۇرلى جاتتىعۋدان وتكەن كاسىبي ماماندار. ياعني شابۋىلعا توتەپ بەرە الادى دەگەن ءسوز. امەريكا تاراپى كوپتەگەن شىعىنعا باتۋى مۇمكىن. ال اق ءۇي ءۇشىن بۇل ءتيىمسىز بولماق.
سوڭعى جىلدارى الەۋەمەتتىك جانە ساياسي داعدارىسقا بايلانىستى ۆەنەسۋەلادان 3 ميلليون ادام باس ساۋعالاپ كەتكەن. ەگەر ەلدەگى تۇراقسىزدىق جالعاسا بەرەتىن بولسا، بۇل كورسەتكىش ەسەلەنۋى مۇمكىن دەيدى ماماندار. يسپانيا، گەرمانيا، فرانسيا جانە ۇلى بريتانيا ەلدەرى سەگىز كۇن ىشىندە پرەزيدەنتتىك سايلاۋ قايتا وتپەسە، گۋايدونى مويىندايتىندىقتارىن ايتىپ، ۋلتيماتۋم قويعان ەدى. مادۋرو ونى قابىلداماي تاستادى. ونىڭ ايتۋىنشا، ەۋروپا مەملەكەتتىڭ ىشكى ساياسي جاعدايىنا ارالاسا المايدى.
www.24.kz