قازاقستانعا ساپارمەن حالىقارالىق پاراليمپيادا كوميتەتىنىڭ پرەزيدەنتى كەلەدى
حالىقارالىق كوميتەت باسشىسى الدىمەن استاناداعى زاماناۋي پاراليمپيادالىق جاتتىعۋ ورتالىعىنىڭ جۇمىسىمەن تانىسادى. ودان سوڭ، قۇرمەتتى قوناقتىڭ قاتىسۋىمەن، سونداي-اق، ق ر مادەنيەت جانە سپورت ءمينيسترى ارىستانبەك مۇحامەدي ۇلى، ۇلتتىق پاراليمپيادا كوميتەتىنىڭ پرەزيدەنتى قايرات بورانبايەۆ، استانا قالاسىنىڭ اكىمى باقىت سۇلتانوۆ جانە ق ر پارلامەنتى ءماجىلىسىنىڭ دەپۋتاتتارىنىڭ قاتىسۋىمەن وتەتىن كەزدەسۋى جوسپارلانعان.
ودان بولەك، اتالعان كەزدەسۋگە وتاندىق تانىمال جۇزگىش ءزۇلفيا عابيدۋللينا، الەكساندر كوليادين سەكىلدى پاراسپورتشىلار قاتىسادى دەپ كۇتىلۋدە.
كەزدەسۋ بارىسىندا قازاقستانداعى پاراسپورتتىڭ دامۋى مەن ۇستىمىزدەگى جىلدىڭ شىلدە ايىندا استانادا وتەتىن پارا پاۋەرليفتينگتەن الەم چەمپيوناتىن ۇيىمداستىرۋدىڭ دايىندىق بارىسى قارالادى.
ساپاردىڭ ەكىنشى كۇنى، حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونستىڭ ۇكىمەت باسشىسى باقىتجان ساعىنتايەۆپەن كەزدەسۋى جوسپارلانعان. وندا كوميتەت باسشىسى قازاقستاننىڭ سوڭعى جىلدارداعى حالىقارالىق ارەنادا قول جەتكىزگەن جەتىستىكتەرى مەن ەلىمىزدە پاراليمپيادانى ودان ءارى ىلگەرىلەتۋ ماسەلەسى ءسوز بولادى.
ايتا كەتسەك، حالىقارالىق پاراليمپيادا كوميتەتى الەمدىك دەڭگەيدەگى بارلىق پاراسپورتتىق شارالاردى وتكىزۋ مەن باسقارۋعا جاۋاپتى. اتالعان ۇيىمنىڭ قۇرامىنا الەمنىڭ 180 ۇلتتىق پاراليمپيادالىق كوميتەتى كىرەدى، ونىڭ ىشىندە ءبىزدىڭ ۇلتتىق پاراليمپيادالىق كوميتەت تە بار.