قازاقستاندىق جاستاردىڭ جوبالارىنا ا ق ش پەن ەۋروپا ەلدەرىنەن سۇرانىس تۇسەدى
وتكەن جىلى 70-كە جۋىق كومپانيا «Startup Kazakhstan» حالىقارالىق اكسەلەراتسيا باعدارلاماسىنىڭ ەكىنشى كەزەڭىنە ءوتتى. ءوندىرىستى سيفرلاندىرۋ، قارجى تەحنولوگيالارى مەن ەلەكتروندى ساۋدا. جەتى جىل بۇرىن بۇلاردىڭ بارلىعى باياۋ دامىپ كەلە جاتقان سالالار ەدى.
ال بۇگىندە ينۆەستورلاردى تارتاتىن ءارى كەز كەلگەن ءىرى كورپوراتسيالاردىڭ قىزىعۋشىلىعىن ارتتىراتىن نەگىزگى قۇرال سانالادى. ۇتىمدى ءارى تىڭ باستامالار ءۇشىن ينۆەستورلار قوماقتى قارجى بولۋگە ءازىر. قازىردىڭ وزىندە باستاماشىل، تالاپتى جاستاردىڭ وزىق ويلارىنا ەۋرازيالىق ەكونوميكالىق ايماقتا، ا ق ش پەن ەۋروپا ەلدەرىندە سۇرانىس كوپ.
«انىعىن ايتقاندا، 10 ستارتاپ- جوبانىڭ تەك ءبىرى عانا قولداۋ تابادى دەپ ويلاعانبىز. الايدا قازىر سەرپىندى جوبالاردىڭ باسىم بولىگى ومىرشەڭ دەپ تانىلادى. ولار بەلگىلى ءبىر سالاعا ەنگىزىلىپ، دامىپ كەلەدى. سول ارقىلى جەكە كومپانيانىڭ ءوسىمى دە جىلىنا 200-300 پايىزعا جەتىپ وتىرعانىن كورەمىز. ءسويتىپ، ولاردىڭ باعاسى ارتاتىندىعى قۋانتادى»، - دەيدى «Almaty Techgarden» باس ديرەكتورى سانجار كەتتەبەكوۆ.
قازاقستانداعى ەكولوگيا مەن قورشاعان ورتانىڭ تازالىعى وزەكتى ماسەلە. بۇل جونىندە جاس ينجەنەرلەردىڭ ءوز ويلارى مەن ۇسىنىستارى بار. وزىق تەحنولوگياعا نەگىزدەلگەن قۇرالدار اتموسفەرانىڭ لاستانۋىن ولشەيدى.
سونىمەن بىرگە سالىنىپ جاتقان ەنەرگوكەشەندەردىڭ جوبالارىن باعالاپ، ءىرى ءوندىرىس ورىندارىنىڭ ەكولوگيالىق قاۋىپسىزدىگىن انىقتاي الادى.
«ەكولوگيالىق كەشەندە بىرنەشە مودۋل بار. ياعني، مودۋل - اۋديت. سونىڭ كومەگىمەن ءبىز كاسىپورىننىڭ ەكولوگياعا كەلتىرەر زيانىن بىلە الامىز. مىسالى، ءوندىرىس قۋاتىن ارتتىرىپ، ءونىم كولەمىن ۇلعايتقان جاعدايدا ول اۋا تازالىعىنا قالاي اسەر ەتەتىنىن تەكسەرۋگە بولادى»، - دەيدى ەكولوگيالىق ستارتاپ- جوبا اۆتورلارىنىڭ ءبىرى نۇرلان دايىروۆ.
جاسىل ەكونوميكا مەن اگروونەركاسىپتىك كەشەندى دامىتۋدا جاستار جاعى بەلسىندىلىك تانىتىپ كەلەدى. مىسالى ارنايى باعدارلاما جۇيەسى بار موبيلدىك قوسىمشا. سونىڭ كومەگىمەن شارۋالار القاپتاردى ارالاماي، ۋاقىت جۇمساماي ەگىستىك احۋالى تۋرالى اقپارات الىپ وتىرادى.
«جوبا ماقساتى - ءبىزدىڭ اۋىلشارۋشىلىق ونىمدەرىنە عارىشتان باقىلاۋ جۇرگىزۋ. عارىش اپپاراتتار سۋرەتكە ءتۇسىرىپ، جەر بەدەرىن وڭدەپ، سوڭعى پايدالانۋشىعا ونىڭ ۆەگيتاتسياسى، ىلعالدىعى بويىنشا جانە وسىمدىكتىڭ ستاتۋسى بويىنشا مالىمەتتەر الادى»، - دەيدى ، نازاربايەۆ زياتكەرلىك مەكتەبىنىڭ عىلىمي زەرتتەۋشىسى جاندوس كەرىمقۇلوۆ.