50 جىلدىق تاجىريبەسى بار، گەرمانيانىڭ جەتەكشى اللەرگولوگى كارل- كريستيان بەرگمانن جەمىسىمىزدى «ناعىز قازىنا» دەپ اتاعان. ونىڭ ايتۋىنشا، گەرمانيا حالقىنىڭ 16 پايىزىندا توزاڭعا اللەرگياسى بار، اراسىندا كوبىسى الما جەي المايدى. وسى ماسەلەگە قاتتى الاڭداعان عالىم ۇزاق جىلدار بويى شەشىمىن ىزدەپتى. ءبىر كۇنى قولىنا ءبىزدىڭ الما تۇسكەن. بەرگمانن ەۋروپالىق المانىڭ تۇپكى تەگى سانالاتىن قازاقستاندىق جەمىستەر اللەرگيا تۋدىرمايتىنىن انىقتادى. قۇرامىندا انتيوكسيدانت كوپ جانە اللەرگەندەر وتە از ەكەن. عالىم زەرتتەۋ جۇرگىزىپ، اللەرگياسى بار 100 ادام 3 اي بويى وسىنداي المانى جەپ جۇرگەن. زەرتتەۋ ناتيجەسى ءبارىن تاڭ قالدىردى. تاجىريبەدەن كەيىن اللەرگياسى بار ادامدار كەز كەلگەن المانى قابىلدايتىن بولىپ، توزاڭ دا اۋىر اسەر ەتپەگەن.
كارل- كريستيان بەرگمانن، اللەرگولوگ: - گەرمانيادا الماعا اللەرگياسى بار ءبىر ميلليوننان استام ادام بۇل جەمىستەن باس تارتقان. ءبىراق مەندە ەمدەلىپ جۇرگەن ءبىر ناۋقاس المانىڭ كەيبىر تۇرلەرىن جەي الاتىنىن ايتقان. ونىڭ قانداي ەرەكشەلىگى بار دەپ تاڭقالدىم. كەيىن قازاقستاننىڭ الماسىنىڭ قۇرامىندا اللەرگەن وتە از ەكەنىن انىقتادىق. بۇل - عاجاپ جاعداي. ەندى ءبىز اللەرگيا تۋدىرمايتىن، كەز كەلگەن اعزاعا پايدالى بولاتىن المانىڭ ءتۇرىن قايتا شىعارۋدى ماقسات تۇتىپ وتىرمىز. قازاقستاننىڭ وسىنداي المانى ءوسىرىپ، ەكسپورتتاۋعا كەرەمەت مۇمكىندىگى بار. ەلدەرىڭىزدەگى عالىمدارمەن بىرلەسىپ، المانىڭ وسى ءتۇرىن زەرتتەۋگە دايىنبىز.