بيىل سالىق تولەۋ جۇيەسىندە وزگەرىستەر بولادى
بۇل تۋرالى پارلامەنت ماجىلىسىندەگى ۇكىمەت ساعاتىندا ق ر قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«قارجى مينيسترلىگى سالىقتىق جانە كەدەندىك اكىمشىلەندىرۋدى سيفرلاندىرۋعا باعىتتالعان ءبىرقاتار جوبالاردى ىسكە اسىرۋدا. 2018-جىلدىڭ قورىتىندىلارى بويىنشا، مەملەكەتتىك كىرىستەر ورگاندارى 22 ميلليون قىزمەت كورسەتتى. ونىڭ ىشىندە 20 ميلليون قىزمەت ەلەكتروندىق تۇردە جۇرگىزىلدى. مەملەكەتتىك قىزمەتتەردى ارى قاراي وڭتايلاندىرۋ جانە اۆتوماتتاندىرۋ ءۇشىن ۆەدومستۆوارالىق كوميسسيا دەڭگەيىندە جول كارتالارى بەكىتىلدى. قىزمەتتەردىڭ كوبىسىن ەلەكتروندىق ۇكىمەت پورتالىنا شىعارۋ كوزدەلىپ وتىر، سونداي-اق جەكە سەكتور كومپانيالارىمەن ينتەگراتسيا جۇرگىزىلۋدە. وسى جۇمىستىڭ ناتيجەسىندە، 2025-جىلعا قاراي قارجى مينيسترلىگىڭ قىزمەتتەرىنىڭ 95 پايىزى ەلەكتروندىق فورماتتا كورسەتىلەتىن بولادى»، - دەدى مينيستر.
ونىڭ سوزىنە قاراعاندا، جىل سايىن بيۋجەتتىك سىنىپتاما كودتارىن قىسقارتۋ، سالىق ەسەپتىلىگى نىساندارىن وڭتايلاندىرۋ بويىنشا جۇمىس جوسپارلى تۇردە جۇرگىزىلىپ كەلەدى. 2015-جىلدان باستاپ بيۋجەتتىك سىنىپتاما كودتارىنىڭ سانى 2,5 ەسەگە قىسقاردى.
«سالىق دەكلاراتسياسىنىڭ نىساندارى 30 پايىزعا وڭتايلاندىرىلدى. سالىقتاردى ەلەكتروندىق تۇردە تولەۋ پروتسەسىن جەڭىلدەتۋ باستالدى. ول ءۇشىن سالىق تولەۋشىنىڭ ءبىرىڭعاي ەلەكتروندىق ءاميان سەرۆيسىنە كوشۋى كوزدەلەدى. بۇل رەتتە، ەستونيانىڭ تاجىريبەسى قىزىق. وندا سالىق تولەۋشىلەر سالىقتى ءبىر رەكۆيزيتكە تولەيدى. سوسىن، سول سوما جەكە تۇلعالاردىڭ بارلىق سالىقتارى بويىنشا اۆتوماتتى تۇردە تارايدى. وسىعان سايكەس، قارجى مينيسترلىگىنىڭ اقپاراتتىق جۇيەلەرى 2019-جىلدىڭ سوڭىنا قاراي ءبىرىڭعاي ەلەكتروندىق ءاميانعا تۇسكەن سالىق تولەمدەرىن وزدەرى شوتتار بويىنشا تاراتادى»، - دەپ ناقتىلادى ءا. سمايىلوۆ.
بۇل تۇرعىدا ول سالىقتاردى قاتە تولەۋدىڭ بولدىرماۋ ناتيجەسىندە تولەم قۇجاتتارىنىڭ سانى قىسقارتىلاتىنىن، انىقتالماعان تولەمدەر مەن نەگىزسىز ايىپپۇلدار الىنىپ تاستالاتىنى، ينكاسسالىق وكىمدەر سانى قىسقارتىلاتىنىن، سالىق تولەۋشىلەردىڭ ۋاقىتى ۇنەمدەلەتىنىن اتاپ ءوتتى.
«سونىمەن قاتار، ەلەكتروندىق ءاميان ارقىلى سالىقتاردى تولەۋدىڭ ءبىرىڭعاي سەرۆيسىنە ءوتۋ ءۇشىن اقپاراتتىق جۇيەنى پىسىقتاۋ جانە دەرەكتەر بازاسىن اكتۋاليزاتسيالاۋ قاجەت. بۇدان باسقا، بيۋجەتتىك، بانكتىك، سالىق، كەدەن زاڭنامالارىنا وزگەرىستەر ەنگىزۋ بويىنشا ۇلكەن جۇمىس جۇرگىزۋ قاجەت بولادى»، - دەدى ۆەدومستۆو باسشىسى.