قورعاس اۋماعىندا حالىقارالىق پوشتا الماسۋ ورنى اشىلادى

تالدىقورعان. قازاقپارات - «قورعاس» شەكارا ماڭى ىنتىماقتاستىعى حالىقارالىق ورتالىعىندا پوشتا الماسۋ ورنى جانە جاڭا قويما سالىنادى.

بۇل تۋرالى «قازپوشتا» ا ق باسقارما ءتوراعاسى ساكەن سارسەنوۆ ءوزىنىڭ فەيسبۋك پاراقشاسىنا جازدى دەپ حابارلايدى قازاقپارات ءتىلشىسى.

«كەشە «قورعاس» ش ى ح و جانە «QZ SILK ROAD LOGISTICS» كومپانياسىنىڭ باسشىلىعىمەن كەزدەستىك. كەزدەسۋ بارىسىندا «قورعاس» تەرريتورياسىندا جاي قۇرىلىسىن سالۋ مەن ونى بوندتىق قويما ۇيىمدارىنا جالعا بەرۋ ماسەلەلەرىن قاراستىردىق. جاڭا قويما جانە ح پ ا و (حالىقارالىق پوشتا الماسۋ ورنى) جۇمىسىن كوكتەمگە قاراي رەتتەۋدى جوسپارلاۋدامىز»، - دەدى «قازپوشتا» باسشىسى.

ونىڭ جازۋىنشا، بۇگىندە ءتيىستى قۇجاتتاردى ازىرلەۋ جۇمىستارى باستالدى.

سونداي-اق، س. سارسەنوۆ قويما جۇمىسشىلارىمەن كەزدەسىپ، ولاردىڭ ەڭبەك ەتۋ جاعدايىن جاقسارتۋ جوسپاردا بار ەكەنىن ءمالىم ەتتى.

ايتا كەتسەك، اتالعان شەكارا ماڭى حالىقارالىق ورتالىعى ارقىلى ۇستىمىزدەگى جىلدىڭ قاڭتار ايىندا 90 توننا جۇك وتكىزىلگەن. وتكەن جىلدىڭ قورىتىندىسى بويىنشا جۇك الماسۋ كورسەتكىشى 1136 توننانى قۇرايدى.