ەل اۋماعىندا جۇرگەن شەتەلدىكتەر مەن ازاماتتىعى جوق تۇلعالار سپورت تۇرلەرىنەن ۇلتتىق قۇراما كوماندالارىنىڭ قاتارىندا حالىقارالىق جارىستارعا قاتىسۋ ءۇشىن مىندەتتى تۇردە قازاقستان ازاماتتىعىن قابىلداۋ قاجەت. كوميتەت تاجىريبە الماسۋ، ءارى قازاقستاندىق اتلەتتەردىڭ كاسىبي وسۋىنە ىقپال ەتۋ ماقساتىندا لەگيونەرلەردى وتاندىق كوماندالار قاتارىنا تارتۋ پراكتيكاسى بارىن ايتتى.
قازىرگى ۋاقىتتا قازاقستاندىق پرەمەر- ليگا مەن ءبىرىنشى ليگا فۋتبول كلۋبتارىندا 106 لەگيونەر، ۇلتتىق ليگانىڭ ۆولەيبول كلۋبتارىندا 28 لەگيونەر، ۇلتتىق ليگانىڭ باسكەتبول كلۋبتارىندا 26 لەگيونەر، سۋپەر ليگانىڭ گاندبول كلۋبتارىندا 6 لەگيونەر، كوگالداعى حوككەي كلۋبتارى قاتارىندا 2 لەگيونەر، شايبالى حوككەي كوماندالارىندا 131 لەگيونەر بار. سونىمەن قاتار، سۋ دوبى، رەگبي، جاعاجاي ۆولەيبولى كلۋبتارىنىڭ قۇرامىنداعى سپورتشىلاردىڭ بارلىعى قازاقستان رەسپۋبليكاسىنىڭ ازاماتتارى.
ق ر مادەنيەت جانە سپورت مينيسترلىگى وتاندىق سپورتتىق رەزەرۆتى قولداۋ، ءارى لەگيونەرلەردىڭ سانىن قىسقارتۋ بويىنشا جۇمىس جۇرگىزىپ جاتقانىن ايتتى. وسى ماقساتتا سپورتتىڭ ويىن تۇرلەرىنەن ەل چەمپيوناتتارىندا ءار كوماندا قۇرامىندا ونەر كورسەتەتىن شەتەلدىك ازاماتتار سانى اتالعان جارىس ەرەجەلەرىنىڭ تالاپتارىمەن شەكتەلگەن. وسىلايشا، بۇل وزگەرىستەر وتاندىق سپورتشىلارعا وزدەرىن تانىتۋ جانە ەلىمىزدىڭ ءوز سپورتتىق رەزەرۆىن تاربيەلەۋگە مۇمكىندىك بەرەدى.
نازەركە ابيبۋللا
BAQ. KZ