«ءبىز اسپاننان سالبىراپ تۇسكەن جوقپىز. 1991-جىلى تاۋەلسىزدىك الساق تا، ءبىزدىڭ ۇلكەن ءارى تەرەڭ تاريحىمىز بار. سول سەبەپتى سەندەرگە «ۇلى دالانىڭ جەتى قىرى» اتتى ماقالامدى ۇسىندىم. اعىلشىندار ارتۋر كورولى تۋرالى ايتادى. قىتايدىڭ 5 مىڭ جىلدىق تاريحى بار دەيدى. ءبىزدىڭ دە تاريحىمىز بار. سونى جالعاستىرىپ جاتقان ۇرپاقپىز. جاستار ءوز تاريحىن ايتا ءبىلۋى كەرەك. عۇندار بار. ودان كەيىنگى اتا- بابامىز - كونە تۇركىلەر. ءبىز - سولاردىڭ ۇرپاعىمىز. كونە تۇركىلەر التاي مەن قارا تەڭىزدىڭ اراسىن الىپ وتىرعان. ال اتيللا - ءبىزدىڭ قىپشاق. ءبىز - سول باتىر بابانىڭ ۇرپاعىمىز. سونى ءبىلۋىمىز كەرەك»، - دەدى ن. نازاربايەۆ جاستار جىلىنىڭ سالتاناتتى اشىلۋ راسىمىندە.
پرەزيدەنتتىڭ ايتۋىنشا، جاستار ءوز تاريحىن ماقتان تۇتۋى قاجەت. سەبەبى كوشپەلىلەر دە الەم وركەنيەتى مەن مادەنيەتىنە ءوز ۇلەسىن قوستى. ال وسى كوشپەلىلەردىڭ ۇرپاعى - قازىرگى جاستار ءوز ەلىن جوعارى بيىكتەرگە جەتكىزە الادى دەگەن نىق سەنىم بار.
«قازاقستاننىڭ بولاشاعىن جاستارعا سەنىپ تاپسىرۋعا بولادى دەپ ويلايمىن. ءبىز تەككە جۇمىس ىستەگەن جوقپىز. ءبىز دۇرىس ۇرپاقتى تاربيەلەي الدىق دەگەن سەنىمدەمىن. ەلىمىزدىڭ بولاشاعى ءۇشىن الاڭدامايمىز. سەندەر قازاقستاندى دامىعان 30 ەلدىڭ قاتارىنا شىعارا الاسىزدار»، - دەپ اتاپ كورسەتتى ن. نازاربايەۆ.
ايتا كەتەيىك، بۇگىنگى جيىندا پرەزيدەنت اۋىلعا بارعان جاستاردىڭ جاردەماقىسىن كوبەيتۋدى تاپسىردى.
بۇدان بولەك، مەملەكەت باسشىسى اۋىل شارۋاشىلىعىن دامىتۋدىڭ ماڭىزدىلىعىن جەتكىزدى.