موڭعوليانىڭ سىرتقى ىستەر ءمينيسترى قازاقستانعا كەلمەيتىن بولدى

استانا. قازاقپارات - موڭعوليانىڭ سىرتقى ىستەر ءمينيسترى دامدين تسوگتبااتار قازاقستانعا رەسمي ساپارىن كەيىنگە شەگەردى.

بۇل تۋرالى قازاقپارات تىلشىسىنە قازاقستاننىڭ سىرتقى ساياسي ۆەدومستۆوسى باسپا ءسوز قىزمەتىنىڭ باسشىسى ايبەك سمادياروۆ حابارلادى.

«موڭعول تاراپى بىزگە موڭعوليا سىرتقى ىستەر ءمينيسترى دامدين تسوگتبااتاردىڭ بۇعان دەيىن جوسپارلانعان ساپارىنىڭ كەيىنگە اۋىستىرىلاتىنى جونىندە حابارلادى»، - دەدى ايبەك سمادياروۆ تەلەفون ارقىلى.

ەسكە سالا كەتەيىك، قازاقستان - موڭعوليا قارىم-قاتىناسىنىڭ تاريحىندا تۇڭعىش رەت موڭعوليانىڭ سىرتقى ىستەر ءمينيسترى داندينگين تسوگتبااتار 24-25- قاڭتار كۇندەرى قازاقستانعا العاش رەت رەسمي ساپارمەن كەلەدى دەپ كۇتىلگەن بولاتىن. ساپار بارىسىندا مينيستر ەلىمىزدىڭ جوعارى باسشىلىعىمەن كەزدەسىپ، ەكىجاقتى جانە كوپجاقتى ىنتىماقتاستىق ماسەلەلەرى تالقىلانۋى ءتيىس ەدى.

بۇگىندە موڭعولياداعى جاعداي كۇردەلى ەكەنىن اتاپ ءوتۋ كەرەك. 10- قاڭتاردا ۇلان باتىر قالاسىنىڭ ورتالىق الاڭىندا نارازىلىق شاراسى ءوتتى. ب ا ق تاراتقان مالىمەتتەرگە سەنسەك، وعان 50 مىڭنان استام ادام قاتىسقان. شاراعا قاتىسۋشىلار ەل پارلامەنتىنىڭ سپيكەرى ميەەگومبىن ەنحبولدتىڭ قىزمەتىنەن كەتۋىن، سونداي-اق «سىبايلاسقان مانان (ەلدەگى ەكى ءىرى پارتيانىڭ اتاۋى) توبىن جويۋدى» تالاپ ەتىپ وتىر.