تاشكەنتتىڭ قاق ورتاسىنان قۇنى ميلليون دوللاردان اساتىن التىن قازىنا تابىلدى
دەپ حابارلايدى «قازاقپارات» ح ا ا.
اسىل بۇيىمداردىڭ كوپشىلىگى 80 جىل بۇرىن جوعالىپ كەتتى دەپ سانالعان.
قازىنا 1870 -جىلى سالىنعان عيماراتتىڭ استىنداعى قۇپيا جەرتولەدەن تابىلدى. وعان اپاراتىن جول بۇزىلىپ، جابىلىپ قالعان بولاتىن.
قۇندى زاتتاردىڭ اراسىندا قۇيما التىن، كۇمىس، مونەتالار، باعالى زاتتار، ىدىس- اياق، مۇسىنشەلەر، ءبىر كەزدەرى سانكت- پەتەربۋرگتەن، ەۋروپادان جەر اۋدارىلعان ادامداردىڭ بۇيىمدارى، كنياز رومانوۆتىڭ تاشكەنتتەگى سارايىنىڭ كوللەكسيالارى، كىتاپتار، ت. ب. بار.
سونداي- اق ⅩⅨ عاسىردا جاسالعان التىن ميكروسكوپ، XVIII- XIX عاسىرلاردا جاسالعان التىن جالاتىلعان فوليانتتار، وزبەك عۇلامالارىنىڭ XII عاسىرعا ءتان قولجازبالارى، وزبەك حاندىقتارىنىڭ قۇجاتتارى دا كەزدەستى.
تابىلعان بۇيىمداردىڭ تاريحي قۇندىلىعى مول بولعاندىقتان، مەملەكەت قورعاۋىنا الىندى.