ساكەن سەيفۋللين. اقساق كيىك
سول شولدە ەل جوق، كۇن جوق ءوسىپ- ونگەن
جاندىكتىڭ كيىك دەگەن بالاسى بار.
بەتپاقتا قىسى- جازى ەل بولمايدى،
ەل- جايلاۋ، وزەن ياكي كول بولمايدى.
بۇتاسى قۋ بايالىش، قارا جۋسان،
كوگالا بەتەگەلى بەل بولمايدى.
بەتپاقتىڭ كولدەنەڭى سەگىز كوشتىك،
سايلانىپ قىس ىشىندە تالاي كوشتىك.
ازامات، ات پەن ايعىر، اتان عانا
شىدار دەپ قوستا وتىرىپ، تالاي دەستىك.
بەتپاقتا ەلسىز- كولسىز ءوسىپ- ونگەن،
جالعىز- اق قۇلان، كيىك شولگە كونگەن.
قازاقتىڭ مالدارىنداي قىبىرلاسىپ،
ءار ويدان توپ- توپ بولىپ جۋساپ ورگەن.
جالعىز- اق ەل جىلىندا كوشىپ وتەر،
اسىعىپ قار سۋىمەن "نەسىپ ەتەر".
قاپتاسىپ، كوشكەن ەلمەن دامىل الماي،
مەرگەندەر اڭ اۋلاسىپ كاسىپ ەتەر.
مەرگەندەر دامىل الماي كيىكتى اتقان،
اۋىلدى قان ساسىتىپ توپىرلاتقان.
كيىكتى ويلاي ما ەكەن تاۋسىلار دەپ،
ازايىپ بىرتە- بىرتە كەلە جاتقان!..
بەتپاقتىڭ كوكپەك، جۋسان، ءشوبى سۇيىق،
سول ءشوپتى قورەك قىلعان بايعۇس كيىك.
تاڭى - اپپاق، ەكى كوزى ءمولدىر قارا،
تيگەندەي ەمەس ادام كوزى قيىپ.
كيىكتى قازاق جانە دەيدى بوكەن،
بەتپاقتى بۇل بەيشارا قىلعان مەكەن.
بوكەندى اتىپ مەرگەن ولتىرگەندە،
جازاسىز جان ءولدى دەپ ويلاي ما ەكەن؟
بوكەننەن سۇلۋ اڭدى مەن كورمەدىم،
وزگە اڭعا جانۋاردى تەڭ كورمەدىم.
كوزدەرى مولدىرەگەن اقبوكەندى
ادامنىڭ بالاسىنان كەم كورمەدىم.
قاپ- قارا ەكى كوزى مولدىرەگەن،
ادەمى ەكى تاناۋ جەلبىرەگەن.
ەلەڭدەپ جاس بالاشا جالتاڭدايدى،
جەل تۇرتكەن جۋساننان دا سەلدىرەگەن.
ازايدى سوڭعى كەزدە بايعۇس بوكەن،
مىڭ- مىڭنان باياعىدا ورەدى ەكەن.
بۇل كۇندە كەلە جاتقان جولاۋشىعا،
كەز كەلەدى اندا- ساندا ساياق- نەكەن.
كەي قازاق ادەت قىلعان كيىك اتىپ،
ءمۇيىزىن پايدا قىلىپ، شەتكە ساتىپ.
ساندالعان ءبىر كيىككە ۇشىراستىم،
ءبىر جىلى بەتپاق شولدە كەلە جاتىپ.
بەتپاقتا كەلە جاتتى اقساق كيىك،
ساندالىپ قاڭعىراقتاپ باسىن ءيىپ.
پانا ىزدەپ شىبىن جانعا سۇيرەتىلىپ،
مەرگەننىڭ كەۋدەسىنە وعى ءتيىپ.
تامادى قارا جەرگە اققان قانى،
قينالىپ ەنتىگەدى شىبىن جانى.
بويالىپ اق دەنەسى قىزىل قانعا،
كەلەدى ءالى كەتىپ جىعىلعالى.
قيىرسىز، بەتپاق دالا.. . قۋراعان ءشول.. .
جالعىز- اق سىرعاندايدى قوڭىلتاق جەل.
مەڭىرەۋ.. . ءتىرى جان جوق.. . جىپ- جىلماعاي.
ەل قايدا؟ ەل الىستا - شۋلاعان ەل!
ساندالىپ كەلە جاتتى اقساق كيىك،
ءبىر توقتاپ، اندا- ساندا ءالىن جيىپ.. .
اقبوكەن ساحارانىن بوتا كوزى،
اتتى ەكەن قانداي مەرگەن كوزى قيىپ؟
كەلەدى قاڭعىلاقتاپ جالعىز ءوزى،
ءتىلى جوق، قۇر جۇرەكتە ايتار ءسوزى.
شاعادى شىبىن جاننىڭ قينالعانىن
جالعىز- اق مولدىرەگەن ەكى كوزى.
جاپاندا ەش سايا جوق شىبىن جانعا،
مونشاقتاپ جەرگە تامعان قىزىل قانعا.
جاپاندا باسىن سۇيەر ءتىرى جان جوق،
ءال كەتىپ سورلى كيىك جىعىلعاندا!..
بوتا كوز ساحارادا قىنا تەرگەن،
كىم ەكەن جاپان تۇزدە سەنى كورگەن؟
ايانىش سەزىمى جوق ءبىر قازاق- اۋ،
ءدال كوزدەپ جۇرەگىڭە اتقان مەرگەن!..