قازاقستاندا سۋارمالى ەگىستىكتەردەن قانشا تابىس تابۋعا بولادى؟
بۇل تۋرالى اۋىل شارۋاشىلىعى ۆيتسە-ءمينيسترى بەرىك بەيسەنعاليەۆ ايتتى، دەپ حابارلايدى قازاقپارات.
«مينيسترلىكتىڭ نەگىزگى باستامالارىنىڭ ءبىرى سۋارمالى جەرلەردى ەنگىزۋگە قاتىستى. مەملەكەتتىك باعدارلاما اياسىندا 2021-جىلعا دەيىن 610 مىڭ گەكتار جەردى ەنگىزۋ قاراستىرىلىپ وتىر، ونىڭ ىشىندە 2019-جىلى 124 مىڭ گەكتار قامتىلماق. ارنايى سالالىق باعدارلاما ازىرلەندى، ونىڭ اياسىندا بولاشاقتا تاعى دا 1,5 ميلليون گەكتار سۋارمالى جەردى اينالىمعا تارتۋ قاراستىرىلعان»، - دەدى ۆيتسە-مينيستر پارلامەنت ماجىلىسىندە اۋىلدىق جەرلەردە بيزنەستى دامىتۋدا ا ك ك- لەر رولىنە ارنالعان دوڭگەلەك ۇستەل وتىرىسىندا.
ونىڭ سوزىنە قاراعاندا، الەمدىك تاجىريبەنى ەسكەرە وتىرىپ، مەملەكەتتىك-جەكەشەلىك ارىپتەستىك بويىنشا جەكە ينۆەستيتسيالاردى تارتۋ ارقىلى قارجىلاندىرۋ مودەلىنە اۋىسۋ ۇسىنىلادى. جاڭا قادام بويىنشا تاريفتىك ساياسات جاسالىپ، بۇل ءوز كەزەگىندە ينۆەستيتسيالاردىڭ قايتارىلۋىن قامتاماسىز ەتەدى.
«وسى سالاعا الداعى 9-10 جىلدا 1,2 تريلليون تەڭگە ينۆەستيتسيا تارتىلادى دەپ كۇتىلۋدە. بۇل تۇرعىدا سۋارمالى جەرلەر اۋماعى 3,5 ميلليون گەكتارعا جەتكىزىلمەك. وسى ەگىستىكتەردەن الىناتىن ءونىمنىڭ جالپى كولەمى 3,7 تريلليون تەڭگەنى قۇرايدى. اتالعان جوبالاردى جۇزەگە اسىرۋ الەۋمەتتىك-كامىپكەرلىك كورپوراتسيالاردى قامتاماسىز ەتە الادى»، - دەدى بەرىك بەيسەنعاليەۆ.