باعدارلاما بارىسىندا مينيسترگە قاراعاندىداعى جاس جىگىتتىڭ ولىمىنە بايلانىستى سۇراق قويىلدى. 1- قاڭتاردا تىركەلگەن قاندى وقيعا ەل ىشىندە ءبىرشاما رەزونونس تۋعىزعان بولاتىن.
«نەلىكتەن بيلىك ۇزاق ۋاقىت ءۇنسىز قالدى؟ نەلىكتەن ءى ءى م- ءنىڭ باسپا ءسوز ءماسليحاتى ارادا ءبىر اپتا وتكەننەن كەيىن عانا ۇيىمداستىرىلدى؟ جەدەل رەسمي اقپاراتتىڭ جوقتىعى جالعان اقپاراتتار تولىپ كەتەتىن ۆاكۋمدى قالىپتاستىرادى دەپ ويلامايسىز با؟» - دەگەن سۇراق قويىلدى مينيسترگە.
وتكىر سۇراقتارعا جاۋاپ بەرگەن اقپارات جانە كوممۋنيكاتسيالار ءمينيسترى داۋرەن ابايەۆ مۇنداي رەزونانستى جاعدايدا ازاماتتار ءتيىستى اقپاراتتى الۋعا قۇقىلى ەكەنىن جەتكىزدى.
«مەن وسى قايعىلى جاعداي بارىمىزگە ۇلكەن ساباق بولار دەپ ويلايمىن. سونىمەن بىرگە، قوعاممەن كوممۋنيكاتسيا ورناتۋ تۇرعىسىندا دا ساباق بولعانى ايقىن. رەزونانستى جاعداي كەزىندە ازاماتتار اقپارات الۋعا قۇقىلى ەكەنىن جاقسى بىلەمىز. الايدا ءبىز بولعان جاعدايدىڭ ءمان-جايىن انىقتاۋ، كۇدىكتىلەردىڭ كىم ەكەنىن انىقتاۋ، باسقا دا اقپاراتتاردى تەكسەرۋ جۇمىسى - بەلگىلى ءبىر ۋاقىتتى تالاپ ەتەتىنىن ءتۇسىنۋىمىز كەرەك. ناقتى بۇل جاعدايدا قاقتىعىسقا ونداعان ادام قاتىسقان. ولاردىڭ ءبارى دە قالانىڭ ءارتۇرلى بولىكتەرىندە جاسىرىنعان. ءتىپتى وزدەرىڭىز بىلەتىندەي، ەڭ باستى كۇدىكتىلەردىڭ ءبىرى ەلدى تاستاپ كەتكەن ەدى. پوليتسيا بۇكىل وبلىس بويىنشا تەرگەۋ امالدارىن جۇرگىزىپ، رەسەيلىك ارىپتەستەرىمەن بىرگە جۇمىستى قولعا الدى. ءوزىڭىز بىلەتىندەي، قاشىپ كەتكەن جىگىت ۇستالدى. دەمەك، تەرگەۋ امالدارىن ءبىزدىڭ پوليتسيا بارىنشا ءتيىمدى جۇرگىزدى»، - دەدى داۋرەن ابايەۆ.
ءمينيستردىڭ ايتۋىنا قاراعاندا، شىنىندا دا اقپاراتتاندىرۋ جۇمىسى كەشىكتىرىلگەن. داۋرەن ابايەۆ سونىمەن بىرگە، اتالعان جايعا بايلانىستى پىكىر بىلدىرگەن ءماجىلىس دەپۋتاتتارىنىڭ ۋاجىنە بايلانىستى سۇراققا جاۋاپ بەردى.
«ەڭ ءبىرىنشى كەزەكتە، دەپۋتاتتاردىڭ سوزدەرى دۇرىس ەكەنىن ايتا كەتكىم كەلەدى. شىنىندا دا، ءبىزدىڭ ەلدە بەيبىتشىلىك پەن كەلىسىمدى ساقتاۋ كەرەك. ۇلتارالىق كەلىسىم - ءبىزدىڭ ەلدىڭ ەڭ باستى باسىمدىقتارىنىڭ ءبىرى. اتالعان جاعدايدا مەنىڭ ويىمشا، اكسەنتتەر ارالاسىپ كەتتى. بولعان وقيعا تۋرالى تاراتىلعان حابارلارعا تالداۋ جۇرگىزەر بولساق، ءبىزدىڭ تىلشىلەر كەرىسىنشە وسى جاعدايعا بارىنشا جاۋاپكەرشىلىكپەن كەلگەنىن اتاپ ءوتۋ كەرەك. ءبىزدىڭ مونيتورينگ قانداي دا ءبىر ايتارلىقتاي بۇزۋشىلىقتى، فاكتىلەرمەن مانيپۋلياتسيالاۋ جاعدايىن بايقاعان جوق»، - دەيدى ول.
ءمينيستردىڭ جاۋابىنا سۇيەنسەك، الەۋمەتتىك جەلىلەردەگى ەموتسيونالدىق سيپاتتاعى پىكىرلەر جاعدايدى ۋشىقتىرا تۇسكەن.
«ب ا ق- تى باقىلاۋعا ءبىزدى شاقىرۋ تۋرالى ايتار بولساق، بۇگىنگى تاڭدا قازىرگى زاڭناما اياسىندا بۇل جۇمىس ونسىز دا اتقارىلىپ جاتىر. جالعان اقپارات تاراتقانى، ۇلتارالىق قاقتىعىس تۋدىرعانى ءۇشىن جاۋاپكەرشىلىك قاراستىرىلعان. بۇل قاقتىعىستى - ۇلتارالىق دەۋگە بولمايدى. بۇل - ءبىرشاما ادام قاتىسقان تۇرمىستىق قاقتىعىس بولدى. ءبىر اقپاراتتى كەلتىرەيىن: جاڭا جىلدان بەرى قازاقستاندا 7 كۇننىڭ ىشىندە 39 قاساقانا كىسى ءولتىرۋ مەن دەنساۋلىققا قاساقانا اۋىر جاراقات سالۋ قىلمىسى بويىنشا 46 قىلمىس تىركەلگەن. وسى قىلمىستاردىڭ باسىم كوپشىلىگى بىرلەسە سپيرتتىك ىشىمدىكتى ءىشۋدىڭ سالدارىنان ورىن العان. دەمەك، قىلمىستىڭ سەبەبى باسقادا. ناقتى بۇل جاعدايعا كەلەر بولساق، ءى ءى م وكىلدەرى ناقتى تۇسىندىرمە بەرگەن بولاتىن. قاقتىعىس مەيرامحانانىڭ اكىمشىلىگى مەن كەلۋشىلەردىڭ اراسىندا بولعان. ەكى تاراپتا دا ءار ۇلتتىڭ وكىلدەرى بولعان. مەنىڭ ويىمشا، ۇلتتىق جانە ءدىني ەرەكشەلىك - قاقتىعىستىڭ نەدەن تۋىنداعانىن تۇسىندىرۋگە بولاتىن ەڭ قاراپايىم فاكتورلار. جاعدايدى ءتۇسىنىپ، شىنايى موتيۆتەردى انىقتاۋدىڭ ورنىنا - تاراپتاردى «بىزدىكى» جانە «سىزدىكى» دەپ بولە سالۋ وپ-وڭاي. ءبىراق، بۇل وتە قاۋىپتى جول»، - دەپ ءتۇيدى داۋرەن ابايەۆ.