قاقتىعىس ايماقتارىنان 47 قازاقستان ازاماتىنىڭ ورالۋىنا قاتىستى بەلگىلى ساياساتتانۋشى ەرلان قارين وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«بۇل - ۇلكەن ماڭىزدى گۋمانيتارلىق ءىس- شارا. سەبەبى، اسكەري ءىس- قيمىلدار، ۇلكەن قاقتىعىستار ورىن الىپ وتىرعان ايماقتان ءبىزدىڭ ازاماتتاردى ەلگە قايتارۋ - ءارتۇرلى مەكەمەلەردىڭ بىرلەسكەن قاجىرلى ەڭبەگىن تالاپ ەتكەن اۋقىمدى ءىس- شارا بولدى. بۇل جۇمىستى ءبىزدىڭ ءتيىستى ورگاندار جوعارى دارەجەدە ۇيىمداستىرا ءبىلدى. ەڭ باستىسى، قاقتىعىس ايماعىنان، اسىرەسە ايەلدەر مەن بالالاردىڭ قايتارىلۋى - ۇلكەن ساۋاپتى ءىس. ويتكەنى، ازاماتتاردىڭ ول ايماققا نە سەبەپتى، قانداي ماقساتتا بارعانى ءبىر بولەك اڭگىمە بولسا، ايەلدەر مەن بالالار كوپ جاعدايدا بەلگىلى ءبىر جاعدايلاردىڭ سالدارىنان، امالدىڭ جوقتىعىنان، ءوز تاڭداۋىنسىز، ءوز ەرىكتەرىنەن تىس سونداي جاعدايلارعا دۋشار بولدى»، - دەيدى ساياساتتانۋشى.
ەرلان قاريننىڭ ايتۋىنا قاراعاندا، مەملەكەت تاراپىنىڭ وسىنداي جاعدايلارعا تۇسىنىستىكپەن قاراپ، تەز ارادا ازاماتتارىنىڭ ەلگە قايتارىلۋىن قامتاماسىز ەتۋى - ءبىزدىڭ مەملەكەتتىڭ ءوز ازاماتتارىنا دەگەن جاۋاپكەرشىلىگىن بىلدىرەدى.
«نەگىزىنەن بۇل شارانىڭ ۇيىمداستىرىلۋى قاي جاعىنان بولسا دا، دۇرىس بولدى. سەبەبى، قاقتىعىس ايماعىنان ازاماتتاردى، اسىرەسە بالالاردى الىپ كەلۋ - راديكالدى كۇشتەردىڭ ءبىزدىڭ ەلگە قارسى ارەكەتتەرى مەن مۇمكىندىكتەرىن ازايتىپ وتىر. قانشا دەگەنمەن ءوز ازاماتتارىمىزدى ەلگە قايتارىپ، بەيىمدەۋ مۇمكىندىگىنە يە بولدىق. ءبىز وسىلايشا، گۋمانيتارلىق ماسەلەلەرمەن بىرگە قاۋىپسىزدىك ماسەلەلەرىن دە شەشىپ وتىرمىز»، - دەيدى ول.
ساياسات تانۋشى ءوز سوزىندە اتاپ وتكەندەي، قاقتىعىس بولىپ جاتقان ايماقتاردان ورالعان ازاماتتار بەلگىلى ءبىر ۋاقىت ارالىعىندا كارانتيندە بولادى. ياعني ولار بەيىمدەۋ ورتالىقتارىنا ورنالاستىرىلادى.
«وسى ۋاقىت ىشىندە ءبىر جاعىنان مەديتسينا قىزمەتكەرلەرى قايتارىلعان ازاماتتاردىڭ دەنساۋلىعىنا باقىلاۋ جاسايدى. ويتكەنى، ينفەكسيالار نەمەسە ءارتۇرلى جۇقپالى اۋرۋلارى بارلار بولۋى مۇمكىن. سوندىقتان، ءبىر اي ىشىندە ءتيىستى باقىلاۋ جاساۋ كەزىندە قانداي دا ءبىر مەديتسينالىق كومەك قاجەت بولاتىن بولسا، سول كومەكتەر كورسەتىلىپ، پسيحولوگتار مەن تەولوگتار، باسقا دا مامانداردىڭ بىرلەسكەن جۇمىسى جۇرگىزىلۋى كەرەك. سودان كەيىن ولاردىڭ قۇجات ماسەلەسى بار. ولار ءوز ەلىنە بوس قولمەن كەلىپ وتىر. كەيبىر بالالاردىڭ كەرەك دەسەڭىز، ءتيىستى قۇجاتتارى دا جوق. سوندىقتان، وسىنداي ماسەلەلەرمەن ءتيىستى ماماندار اينالىسادى. بۇل قاي جاعىنان بولسا دا، دۇرىس قادام. ارينە، بۇل رەتتە ءبىزدىڭ ارناۋلى قىزمەتتەردىڭ دە ەڭبەگىن اتاپ ءوتۋ كەرەك. جوعارى دەڭگەيدەگى حالىقارالىق وپەراتسيانىڭ ۇيىمداستىرىلۋى ءبىزدىڭ اسكەري ارناۋلى قىزمەتتەردىڭ بىلىكتىلىگىن، دايىندىقتارىن دا كورسەتىپ وتىر»، - دەيدى ەرلان قارين.
ەسكە سالا كەتسەك، بۇگىن قازاقستان پرەزيدەنتى نۇرسۇلتان نازاربايەۆ قازاقستان ازاماتتارىن سيريادان ەۆاكۋاتسيالاۋعا بايلانىستى مالىمدەمە جاساعان بولاتىن. مەملەكەت باسشىسى ءوز سوزىندە اتاپ وتكەندەي، 6 قاڭتاردا قۇقىق قورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان 47 ازاماتىمىز، سونىڭ ىشىندە 30 بالا ەلىمىزگە قايتارىلعان.
اۆتور: ايان بەكەن ۇلى