«مارقۇمنىڭ جاقىندارىنا كوڭىل ايتامىن جانە بۇل وقيعادا ۇلتارالىق سيپات جوق ەكەنىن باسا ايتقىم كەلەدى. ماعان جەتكەن اقپارات بويىنشا، توبەلەسكەندەر ءار ۇلتتىڭ وكىلى بولعان. توبەلەسكەندەر اراسىندا قازاق تا بولعان. بۇل توبەلەستە ۇلتارالىق ارازدىق بولدى دەي المايمىن» دەدى ول.
پاشينيان ارمەنيا باسىلىمدارى بۇل جاعدايعا قاتىستى اقپارات تاراتقاندا بارلىق فاكتىنى تەكسەرۋ كەرەكتىگىن ەسكەرتتى.
7 - قاڭتاردا ارمەنيانىڭ سىرتقى ىستەر مينيسترلىگى دە قاراعاندىداعى وقيعاعا قاتىستى مالىمدەمە جاساعان. قازاقستان سىرتقى ىستەر ءمينيسترى بەيبىت اتامقۇلوۆ پەن ارمەنيا سىرتقى ىستەر ءمينيسترى زوگراب مناتساكانيان تەلەفون ارقىلى سويلەسكەنى حابارلاندى.
ارمەنيا سىرتقى ىستەر ءمينيسترىنىڭ ورىنباسارى شاۆارش كوچارياننىڭ ايتۋىنشا، رەسمي ەريەۆان مەن استانا جاعدايعا قاتىستى ءجيى بايلانىسىپ وتىر.
«ەكى تاراپ بۇل تەك تۇرمىستىق جانجال دەپ ويلايدى. بۇل وقيعاعا ۇلتارالىق قاقتىعىس سيپاتىن بەرۋگە بولمايدى. قازاقستان تاراپى جاعدايدى باقىلاۋدا ۇستاۋعا، ۇلتارالىق قاقتىعىستىڭ تۋىنداماۋىنا كەپىلدىك بەردى. جۇمىستار جاسالىپ جاتىر. ارمەنيانىڭ قازاقستانداعى ەلشىلىگى جەرگىلىكتى ارمياندارمەن بايلانىسىپ وتىر» دەدى شاۆارش كوچاريان.
ارمەنيا سىرتقى ىستەر ءمينيسترىنىڭ ورىنباسارى «بۇل نازىك ماسەلەدە ارانداتۋشىلىققا جول بەرمەۋ كەرەكتىگىن» ايتتى.
ەستەرىڭىزگە سالا كەتەيىك، جاڭا جىل ءتۇنى قاراعاندىداعى مەيرامحانالاردىڭ بىرىندە توبەلەس بولىپ، ءبىر ادام قازا تاۋىپ، ءتورت ادام جاراقاتتانعان. بارلىعى جەتى ادام ۇستالعان. تاعى ءبىر ادام نارەك گۋرۋريانعا حالىقارالىق ىزدەۋ جاريالانعان.
6 - قاڭتاردا قاراعاندىدا جۇزدەگەن ادام كوشەگە شىعىپ «قىلمىسكەردى» تابۋدى تالاپ ەتكەن. قاراعاندى وبلىسى اكىمى ەرلان قوشانوۆ جينالعان جۇرتپەن كەزدەسىپ، ىزدەۋ جۇمىستارى ءجۇرىپ جاتقانىن ايتىپ، حالىقتى سابىرعا شاقىرعان.