قىتايدا ۇزاق ۋاقىت ساقتاۋعا بولاتىن قىمىز نارىققا شىقتى

استانا. قازاقپارات - قىتايدىڭ ىلە قازاق اۆتونوميالى وبلىسىندا «ارىس» ساۋدا بەلگىسىمەن ۇزاق ۋاقىت ساقتاۋعا بولاتىن قىمىز نارىققا شىعارىلدى، دەپ جازادى قىتايلىق CNR سايتى.

اتالعان دەرەككوزدىڭ حابارلاۋىنشا، ىلە قازاق اۆتونوميالى وبلىسىنىڭ كۇنەس اۋدانىنداعى قىمىز ءونىمىن شىعاراتىن ءوندىرىس ورتالىعىنا 3 ميلليون يۋان قارجى جۇمسالعان.

وسى كەشەندە «ارىس» ساۋدا بەلگىسىمەن ءوندىرىلىپ جاتقان قىمىزدى 6-ايعا دەيىن ساپاسىن جوعالتپاي ساقتاۋعا بولادى. مۇنداعى بارلىق ءوندىرىس بارىسى اۆتوماتتاندىرىلعان. ال قاجەتتى وزىق تەحنيكالاردىڭ كەيبىرىن گەرمانيادان تاپسىرىسپەن الدىرعان. نارىقتا 750 م ل ىدىسقا قۇيىلعان «ارىس» 28 يۋانعا (تەڭگەگە شاققاندا 1500 تەڭگە) ساتىلسا، ال 300 م ل ىدىسقا قۇيىلعانى 12 (650 تەڭگە) يۋانعا باعالانعان.

كاسىپورىن جازعى ۋاقىتتا كۇنىنە 10 توننا، قىستا 1 تونناعا دەيىن قىمىز دايىنداپ بازارعا شىعارماقشى.

اۆتور : باقىتجول كاكەش