قازاقستاندىق ارۋ يتاليالىقتاردىڭ وتانداستارىنان نەمەن ەرەكشەلەنەتىنىن ايتىپ بەردى دەپ جازادى Sputnik قازاقستان.
1. يتاليادا ادامدار 10 جىلعا دەيىن نەكەلەسپەي جۇرەدى
«جۇبايىم ەكەۋىمىز وتكەن جىلى ساۋىردە عانا ۇيلەندىك. ءبىزدىڭ قوعام ءۇشىن بۇل جات نارسە ەكەنىن بىلەمىن، ءبىراق اتا- انام ەركىن كوزقاراستى ادامدار. ءبىز ەكى مەملەكەت اراسىندا ءومىر سۇرگەننەن كەيىن كوپ قۇجات راسىمدەۋ كەرەك بولدى»، - دەدى ماليكا.
مۇنداي ۇزاق كەزدەسۋدىڭ سىرى وتباسىلىق قۇندىلىقتاردىڭ جوعارى باعالانۋىندا ەكەن. يتاليادا اجىراسۋ كوپ بولعانىمەن، قازاقستانمەن سالىستىرعاندا ءجۇز ەسە از.
«يتاليادا ادامدار كەش ۇيلەنەدى. ءبارى بىرنەشە ءبىلىم الادى دەسە بولادى. كۇيەۋىم 47 جاسىندا ۇيلەندى. جاس ايىرماشىلىعىمىز 20 جىل. ءبىراق ول ءالى كۇنگە دەيىن ءبىلىم الىپ ءجۇر»، - دەدى ماليكا.
2. قاريالار سەزىمدەرىن بىلدىرۋدەن قىسىلمايدى
ماليكانىڭ سوزىنشە، يتاليالىق ەركەكتەر جۇرت ويلاعانداي رومانتيك ەمەس ەكەن. كۇيەۋى وعان سىيلىق تاڭداتىپ، اقشاسىن تولەيتىن جاسىرمادى.
ايتسە دە، مۇندا قاريالار قول ۇستاسىپ جۇرەدى. ەر ادامدار اناسىنا جاقىن، ايەلدەرىن قاتتى قىزعانادى ەكەن.
يتاليالىقتار قازاقتار سياقتى قوناقجاي. ءبىراق ءبىر جەرگە بارماس بۇرىن الدىن- الا ەسكەرتەتىن كورىنەدى.
«باتىستا قوناق وزىمەن بىرگە تاماق الا كەلەدى. ءبىز قوناققا بارساق، وزىمىزبەن بىرگە اسباسقى، قىزىل شاراپ نەمەسە بالمۇزداق اپارامىز. ارنايى وتىرىس بولسا، وعان مىندەتتى تۇردە دايىندالادى. ەنەم ءبىزدى اسقا شاقىرعان كەزدە داستارحانعا وننان استام تاماق ازىرلەيدى. تۋعان كۇن بولسا، مىندەتتى تۇردە اققاينار قۇيىلادى»، - دەدى ماليكا.
3. ادامدار شاش كۇتىمىنە ەرەكشە ءمان بەرەدى
85 جاستاعى ەنەسى اپتاسىنا ءۇش رەت شاشتاراز شاقىرتادى ەكەن.
«جەرگىلىكتى ايەلدەر شاش ۇلگىسىن ۇنەمى جاساتىپ وتىرادى. بالالارمەن ءجۇرىپ اپتاسىنا بىرنەشە رەت سۇلۋلىق سالونىنا بارۋعا ۋاقىتىم بولمايدى. سونى بايقاعان ەنەم «ماليكا، سەنىڭ شاشتارازىڭ جوق قوي دەيمىن. مەن ساعان وزىمدىكىن بەرە تۇرايىنشى. سەن دە شاشتاراز قىزمەتىن پايدالان» دەگەن كىشىگىرىم ەسكەرتۋ جاسادى. ارينە، ەنەم سەكىلدى اپتاسىنا بىرنەشە رەت شاشتاراز قىزمەتىنە جۇگىنەتىن ۋاقىتىم جوق. دەسە دە، سۇلۋلىق سالونىنا اپتاسىنا ءبىر رەت بارىپ تۇرامىن»، - دەدى ول.
4. تويدى نەسيەگە جاساۋ ۇيات نارسە
قازاق قوعامى مەن يتاليا قوعامىنىڭ باستى ايىرماشىلىعىن اتاپ ءوتتى. مۇندا اتا- انالار مۇمكىندىگىنشە بالالاردان بولەك تۇرۋعا تىرىسادى. سونداي- اق، يتاليالىقتار ءۇشىن ءوز ۇيىڭدە تۇرۋ ماڭىزدى ەمەس. ءتىپتى، قارتايعانشا پاتەر جالداپ تۇرا بەرۋلەرى مۇمكىن. ماليكا يتاليالىقتاردىڭ تويعا نەسيە الۋدى ۇيات دەپ سانايتىنىن ايتتى.
«مۇندا توي جاساۋعا ءۇش- ءتورت جىل بويى دايىندالادى. مۇندا دا 200-300 ادامعا ارنالعان تويلار وتەدى، ءبىراق ونداي تويدى ەكى جاق بىرىگىپ وتكىزەدى»، - دەدى ماليكا.
5. دەكرەتتىك دەمالىس ءۇش اي مەرزىمىنە بەرىلەدى
مۇندا جۇمىس تابۋى قيىن، سوندىقتان ايەلدەردىڭ باسىم كوپشىلىگى كوپ بالا تۋمايدى. دەكرەتتىك دەمالىس تا ءۇش ايعا عانا بەرىلەدى. ماليكانىڭ قىزى مەن ۇلىنىڭ اراسى ءۇش جىل. ەكەۋى ءبىر كۇندە، ءبىر ساعاتتا دۇنيەگە كەلگەن. قىزى 2014 -جىلى 28 - ناۋرىزدا ساعات 04:15 تە، ال ۇلى 2017 -جىلى 28 - ناۋرىزدا ساعات 04:12 دە تۋىلعان. قىزىنىڭ ەسىمى - يامۋر، ال ۇلىنىڭ اتى - ميكەلە.
«ادەتتە ەۋروپادا تابىس جوعارى دەپ جاتادى. مەنىڭشە، بۇل قاتە تۇسىنىك. سەبەبى، مۇندا ءومىر ءسۇرۋ دەڭگەيى جوعارى جانە بارلىعى قىمبات. ياعني كۇنكورىس دەڭگەيى قازاقستانمەن بىردەي دەسەك تە بولادى.
يتاليادا ايەلدەردى وتە جوعارى باعالايدى. قازاقستاندا ايەل ادامدار ءبىرىنشى ورىنعا بالا- شاعاسىن، كۇيەۋىن، كەيىن تۋىستارىن، سوڭىندا ءوزىن قويادى.
ال يتاليادا كەرىسىنشە ايەلدەر ءبىرىنشى ورىنعا ءوزىن، كەيىن كۇيەۋىن، سوڭىندا بالالارىن قويادى»، - دەدى ماليكا قارادجانوۆا.
6. تاماقتى كوبىنەسە ەر ادامدار ازىرلەيدى
يتاليادا انالار بالالارىنىڭ بارىنە تاماق جاساۋدى ۇيرەتەدى. ماليكانىڭ جولداسى باستاپقى ءبىر- ەكى جىلدا تاعامدى ءوزى ازىرلەگەن. قازىر دە اپتاسىنا بىرنەشە رەت تۇسكى استى ءوزى دايىندايدى. اتالعان ەلدە باس اسپازداردىڭ بارلىعى دەرلىك - ەر ادامدار ەكەن.