تانىمال كينو اكتەر پرەزيدەنتتىككە ۇمىتكەر اتانعانىن ۋكراينالىقتارعا جاڭا جىلدىق ۇندەۋى كەزىندە «1 1» تەلەارناسى ارقىلى حابارلاعان. بەينەجازبا ءارتىستىڭ Facebook پاراقشاسىندا جاريالاندى.
«مەنەن كوپتەن بەرى: «قاتىساسىڭ با، قاتىسپايسىڭ با؟» دەپ سۇرايدى. بىلەسىز بە، ءبىزدىڭ «ۇلى» ساياساتكەرلەر سياقتى سىزدەرگە قۇر ۋادە بەرگىم كەلمەيدى. جاڭا جىلعا بىرنەشە مينۋتقا قالعاندا مەن سىزدەرگە ۋادە بەرىپ، ونى بىردەن ورىندايمىن. قىمباتتى ۋكراينالىقتار، مەن پرەزيدەنت سايلاۋىنا قاتىسۋعا ۋادە بەرەمىن»، - دەيدى اكتەر.
زەلەنسكيدىڭ سوزىنشە، قازىرگى تاڭدا ءار ۋكراينالىق ءۇشىن تاڭداۋدىڭ ءۇش جولى بار.
«ءبىرىنشى جول ءومىردىڭ اعىسىمەن بۇرىنعىداي ءومىر سۇرە بەرەسىن. بۇل قالىپتى جاعداي، اركىمنىڭ ءوز تاڭداۋى. ەكىنشى جول كيىمدەرىڭدى جيناپ، وزگە ەلگە بارىپ، اقشا تاۋىپ، جاقىندارىڭ مەن تۋىستارىڭا جىبەرىپ وتىرۋ. بۇل دا قالىپتى جاعداي»، - دەيدى ازىلكەش.
الايدا ۆلاديمير زەلەنسكي ءۇشىنشى جولدى تاڭداعانىن، ۋكريانادا قانداي دا ءبىر وزگەرىس ەنگىزۋگە ءوزى تىرىسىپ كورەتىنىن ايتقان.