ەلوردا جاڭا جىلدا ەرتەگى شاھارعا اينالدى
جاڭا جىل الدىندا قالا مىڭداعان ءتۇرلى-ءتۇستى تۇنگى شام ساۋلەسىنە بولەندى، ەرەكشە ينستاللياتسيا جانە جارقىراعان مۇز مۇسىندەر پايدا بولىپ، ەلوردا كەلبەتى ارلەنە ءتۇستى، دەپ حابارلايدى قازاقپارات قالا اكىمدىگىنىڭ سايتىنا سىلتەمە جاساپ.
سىزدەردىڭ نازارلارىڭىزعا قىسقى ەرتەگى قالانىڭ فوتورەپارتاجىن ۇسىنامىز.
قالا كوشەلەرى مەن ساياباقتارى اق قارعا ورانعالى قالا تۇرعىندارى مەن قوناقتارى ەلوردانىڭ قىسقى ەرتەگىسىنە ەنە الادى. ورتالىق كوشەلەرىندىڭ باعانالارىندا اقشاقار جانە ويۋ-ورنەك تۇرىندەگى يلليۋميناتسيالار ورناتىلدى، جول ايرىقتار مەن جاياۋ جۇرگىنشىلەر جولدارى جارقىن فيگۋرالار تۇرىندەگى قارلى شارلار، اۆتوكولىكتەر، جاڭاجىلدىق ويىنشىقتارمەن اشەكەيلەندى.
قالالىق الاڭ، بوتانيكالىق باق اۋماعى، EXPO-2017، «جەتىسۋ» ساياباعى، «حان شاتىر» س و و اۋماعى، پرەزيدەنت ساياباعى، «قازاق ەلى» مونۋمەنتى الاڭى، «اتاتۇرىك» ساياباعى، ەسىل وزەنىنىڭ جاعالاۋى، «جەرۇيىق» ساياباعى، اقبۇلاق وزەنىنىڭ جاعاسى، «الاتاۋ» سك اۋماعى ءتۇرلى دەكوراتسيامەن ارلەنگەن.
الايدا، قالا تۇرعىندارى مەن قوناقتارىنىڭ ەڭ سۇيىكتى دەمالۋ ورىندارى بولىپ ەسىل وزەنىنىڭ جاعاسى، سىرعاناقتار مەن مۇز ايدىندارى قالا بەرمەك. مۇندا كىشكەنتاي قوناقتار مەن ەرەسەكتەردى ءتۇرلى-ءتۇستى جارىقپەن كومكەرىلگەن مۇزدان جاسالعان مۇسىندەر، تيۋبينگتى جالعا الىپ سىرعاناۋعا ارنالعان كىشكەنتاي جانە ۇلكەن توبەشىكتەر قارسى الادى.
ەرەسەكتەر ءۇشىن ۇيىمداستىرۋشىلار جالعا بەرىلەتىن كونكيلەردى، شاڭعىلار مەن حوككەي تاياقتارىن ۇسىنۋدا. قالانىڭ كوپتەگەن اۋداندارىندا جاڭادىلدىق شىرشالار ورناتىلعان. ءارقايسىسى ءبىر-بىرىنەن اسەمدىگىمەن ەرەكشەلەنەدى.
كەلەر جىلدى بىلدىرەتىن كولەمدى ساندار ءداستۇرلى اشەكەيلەر بولدى. ولاردى جارقىراعان دالىزدەردەن، پوستامەنتتەردەن، قالامىزدىڭ كورىكتى جەرلەرىنەن كورۋگە بولادى.
ايتا كەتەيىك، استانادا #AstanaWinterland اتتى قىسقى ەرتەگى جوباسى باستاۋ العان بولاتىن. ونىڭ اياسىندا:12 تاقىرىپتىق الاڭ، 32 مۇز ايدىنى، 36 مۇز توبەشىك ۇيىمداستىرىلىپ، 400 دەن استام ءىس-شارا وتەدى.
قالادا ءتۇرلى-ءتۇستى شامدار قوسۋلى، اياق استىندا قار سىقىرلاپ، جاپالاقتاپ جاۋعان قاردى قولعا قوندىرعىڭىز كەلەدى. جاڭا جىل قارساڭىنداعى ەرتەگى ۋاقىتى باستالعان بولۋى كەرەك. مەرەكەنى سەزىنۋ ءۇشىن قالا كوشەلەرىنە شىعىپ، الاڭدارعا بارىپ، مۇز ايدىندارىندا، سىرعاناقتاردا بالالىق شاقتى ەسكە الىپ، ويناڭىز.