بۇل تۋرالى وتاندىق ب ا ق وكىلدەرىنە سۇحبات بەرگەن ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«تاۋەلسىزدىگىمىزدىڭ بارلىق جىلدارىنداعىداي بۇل جىل دا وتە مازمۇندى، وتە قارقىندى بولدى. بۇل جىل ەلىمىز ءۇشىن ءتۇرلى وقيعالارعا تولى. ەستە قالار ماڭىزدى وقيعالارعا توقتالار بولسام، مەن ءۇشىن، جالپى قازاقستاندىقتار ءۇشىن ەلوردامىز استانانىڭ 20 جىلدىق مەرەيتويىنىڭ ورنى ايرىقشا. ەشتەڭە جوق، ساعىمداي جازىق دالادا ءدال وسىنداي قالا سالىنىپ، ەلىمىزدىڭ شىنايى كەلبەتىنە اينالدى. دەگەنمەن، بۇل قالانىڭ سىنشىلارى دا، جاقسى كورەتىندەرى دە بار»، - دەدى ەلباسى.
ق ر پرەزيدەنتى ب ا ق وكىلدەرىمەن كەزدەسۋ الدىندا قازاقستان كارتاسىنا كوز سالعانىن اتاپ ءوتتى.
«ءبىزدىڭ بارلىق وڭىرلەرىمىز كۇرت قۇرلىقتى بولىپ كەلەدى. باتىستان باستاپ قاراساڭىز، شىعىستا، وڭتۇستىك تە سولاي. دەمەك، شىمكەنتكە كەتۋ كەرەك پە ەدى؟ ول جاقتا جازدا وتە ىستىق، قولايسىز. ەندى مىنە قالانىڭ 20 جىلدىعىن اتاپ ءوتىپ وتىرمىز. ادام ءومىرى، جالپى، تاريح ءۇشىن 20 جىل دەگەنىمىز نە؟ ەشتەڭە دە ەمەس. الايدا، قازاقستان ءبىر قالاعا بايىدى. استانا ءوزىنىڭ قۇرىلىسى بارىسىندا قالعان بارلىق وبلىس ورتالىقتارىن سۇيرەدى دەسەك تە بولادى»، - دەدى مەملەكەت باسشىسى.
نۇرسۇلتان نازاربايەۆ 1979-جىلى 12- جەلتوقسان كۇنى قازاقستان كومپارتياسى ورتالىق كوميتەتىنىڭ حاتشىسى بولىپ تاعايىندالعانىن ەسكە الدى.
«سودان بەرى باسشىلىق قىزمەتتە كەلەمىن. كەلەسى جىلى 40 جىل تولادى. نە بولعانىن، نە جاسالعانىن سالىستىرۋعا دا مۇمكىنشىلىگىم بار. ماسەلەن، اتىراۋ قالاسى. بۇل بۇرىنعى اتىراۋ ەمەس، وندا رەزەڭكە ەتىكسىز ءجۇرۋ مۇمكىن ەمەس بولاتىن. ءسال جاڭبىر جاۋسا ءجۇرۋ مۇمكىن ەمەس ەدى. قازىر ول زاماناۋي، تاماشا قالاعا اينالدى. اقتاۋدا كاسپي ماڭى ەلدەرىنىڭ پرەزيدەنتتەرىمەن سامميت وتكىزدىك. 1,5 شاقىرىمعا سوزىلعان تاماشا جاعالاۋ سالىنعان، جانىڭ سۇيسىنەدى. كەلەشەگى مۇنان دا زور. بۇل ەلىمىزدىڭ نەگىزگى دەمالىس وڭىرىنە اينالادى دەپ ويلايمىن. ءوزىمىزدىڭ تاماشا كوگىلدىر تەڭىزىمىز، شومىلۋعا قولايلى ماۋسىمىمىز بار. شاعىن عانا ورال قالاسى قازىرگى ۋاقىتتا تۇرلەنىپ وتىر. اقتوبە دە كوز ىلەسپەس جىلدامدىقپەن دامىپ كەلەدى. وندا 130 مىڭ ادامعا ارنالعان 3 جاڭا اۋدان بوي كوتەرىپ كەلەدى»، - دەدى ەلباسى.
سونىمەن قاتار مەملەكەت باسشىسى تالدىقورعان قالاسىنىڭ دا سوڭعى جىلدارى زاماناۋي قالاعا اينالىپ كەلە جاتقانىن باسا ايتتى. قوستاناي، پەتروپاۆل، وسكەمەن جانە الماتى قالالارىنىڭ دامۋ قارقىنىنا جوعارى باعا بەردى.
«اتاماعاندارىم رەنجىمەسىن، بارلىعىن دا اتاي الامىن. شىندىعىندا بارلىعى دا استاناعا قاراپ بوي تۇزەيدى. ەندىگى ۋاقىتتا ءدال وسى تەندەنتسيا اۋداندارعا، شاعىن قالالارعا تاراۋدا. جاقسى ءبىر ءىستىڭ ۇلگىسى دەگەنىمىز وسى»، - دەدى نۇرسۇلتان نازاربايەۆ.
ق ر پرەزيدەنتى استانانىڭ 20 جىلدىق مەرەيتويىنا وراي بارلىق وڭىرلەر ەلوردادا نىساندار سالعانىن اتاپ ءوتتى. اتىراۋ وبلىسىنىڭ ەسىلدىڭ ۇستىنەن سالعان بەكىرە بالىعى پىشىندەگى كوپىردى ايرىقشا اتادى.