«ءوزارا كورشى بەس مەملەكەت حالقىنىڭ ءدىنى مەن ءدىلى ءبىر، ياعني ءبىر وڭىردە تۇرىپ جاتىرمىز. ءبىر ءبىرىمىزدىڭ ءوزارا تۇسىنىگىمىز بار. كەڭەس وداعى ىدىراپ، جەكە قالعان كەزدە وسى ەلدەردىڭ اراسىنداعى ىنتىماقتىڭ تىعىز بولۋى قاجەت ەدى. اتاپ ايتقاندا، بارشامىزعا تىعىز قارىم-قاتىناس قاۋىپسىزدىككە، ەكونوميكاعا كەرەك بولدى. سونى ويلاپ، بىرنەشە رەت ءتيىستى باستامالار جاساعان بولاتىنمىن. وسى ورايدا ورتالىق ازيادا ءوزىمىزدىڭ ەكونوميكالىق وداعىمىزدى قۇرۋ، شەكارامىزدى اشۋ، ساۋدا-ساتتىقتى دامىتۋ، مادەني بايلانىستاردى نىعايتۋ باستامالارى ۇسىنىلدى. بۇل باعىتتاعى قادامدار بۇزىلىپ كەتتى»، - دەدى مەملەكەت باسشىسى.
بۇل رەتتە پرەزيدەنت ءار ەل تاۋەلسىزدىگىن العاننان كەيىن، ءوزىنىڭ دامۋ جولىن ىزدەپ، ءارتۇرلى باعىتتى تاڭداعانىن اتاپ ءوتتى. سونىڭ ناتيجەسىندە يگى باستامالار ورىندالماي قالدى.
سونىمەن قاتار ن. نازاربايەۆ سوڭعى كەزدەرى ورتالىق ازيا ەلدەرى پرەزيدەنتتەرىمەن كەزدەسۋلەر ءجيى ءوتىپ جاتقانىن تىلگە تيەك ەتتى.
«بارلىق وسى ەلدەردىڭ مەملەكەت باسشىلارى ءوزارا ساپارمەن ءبىر-ءبىرىمىزدىڭ ەلىمىزگە بارىپ كەلدىك. قازاقستانداعى وزبەكستاننىڭ مادەنيە كۇندەرى اياقتالىپ كەلە جاتىر. الداعى جىلدىڭ باسىندا قازاقستاننىڭ وزبەكستانداعى ونەر كۇندەرىن وتكىزۋگە قاتىستى قابىلداۋ وتەدى، مەن ول جەردە بولامىن. تاشكەنتتە كەزدەسۋ بولادى. قىرعىز باۋىرلارمەن دە، تۇرىكمەندەرمەن دە، تاجىكستانمەن دە قارىم-قاتىناسىمىز وتە جاقسى. ءبىراق ساۋدا-ساتتىقتىڭ جاعدايى ءارتۇرلى»، - دەدى ەلباسى.