سەبەبى، جارقىن كەلەكشەكتى كۇتكەن جاندار كەز كەلگەن ۋاقىتتا اجال قۇرساۋىنا ءتۇسىپ قالۋى مۇمكىن.
ەندەشە، ساياحاتتاۋعا اتتانىپ، ومىرلەرىمەن ويدا-جوقتا قوش ايتىسقان ادامدار تۋرالى Bigpicture.ru سايتىنا سىلتەمە جاساعان NUR. KZ جازادى.
1. ەكستسەنترلى سۋرەتشى الەم مارشى ۋاقىتىندا توي كويلەكپەن قازا تاپقان
2008-جىلدىڭ كوكتەمىندە 33 جاستاعى سۋرەتشى پيپپا باككا بەيبىتشىلىك پەن ماحابباتتىڭ بەلگىسىندەي كويلەك كيىپ، شىعىس ەۋروپا مەن تاياۋ شىعىسقا اتتانىپ كەتكەن. ول ءوز ساياحاتىن قۇربىسى سيليا مورومەن بىرگە 8- ناۋرىز كۇنى باستاعان كورىنەدى.
وسىلايشا، اق كويلەكتەگى ايەلدەر ميلاننان تەل-اۆيۆكە جول تارتىپ، جول بويى ءتۇرلى اكسيالار ۇيىمداستىرىپ وتىرعان. ولار حالىقتىڭ بويىنا ماحاببات پەن مەيىرىمدىلىك ۇيالاتقىسى كەلىپتى.
يتاليالىق ارۋ بارلىق ساياحات بويى ءوز جاقىندارىمەن حابارلاسىپ وتىرعان ەكەن. اقىرىندا ول يتاليادان، بالقان ەلدەرىنەن ءوتىپ، تۇركياعا جەتكەن كورىنەدى. ساياحات ۋاقىتىندا كەلىنشەك يتاليالىق ب ا ق وكىلدەرىمەن دە بايلانىستا بولىپتى.
الايدا ارۋ 31- ناۋرىز كۇنى جوعالىپ كەتكەن. انىقتالعانداي، جوعالعاننان بىرنەشە كۇن بۇرىن ول قۇربىسىمەن رەنجىسىپ، ساياحاتىن جالعىز جالعاستىرىپ كەتىپتى.
كەيىن بەلگىلى بولعانداي، تۇرىك جەرىندە پيپپانى 38 جاستاعى ازامات توناپ، زورلاپ تاستاعان ەكەن. ءوز قىلمىسىن جاسىرۋ ءۇشىن ءوز قۇربانىن تۇنشىقتىرىپ ءولتىرىپتى.
پوليتسيا قانىشەردى مارقۇمنىڭ تەلەفون ءنومىرىن پايدالانعان سوڭ تاۋىپ العان. ۇستالعان سوڭ ول يتاليالىقتىڭ دەنەسىن قايدا جاسىرعانىن ايتىپ بەرگەن.
اق كيىمدەگى سۋرەتشىنىڭ دەنەسى ستامبۇل ماڭىنداعى ورماندا، بۇتاقتاردىڭ اراسىنان تابىلعان.
2. عاشىقتاردىڭ ۆەلوسيپەدپەن جاساعان ساياحاتى تاجىكستان تاۋلارىندا اياقتالدى
29 جاستاعى امەريكالىق دجەي وستين مەن لورەن دجوحەگەن گەيگان وتكەن جىلدىڭ شىلدە ايىندا امەريكا قۇراما شتاتتارىنان ۆەلوسيپەدپەن شىعىپ كەتكەن. وسىلايشا، قوس عاشىق 369 كۇن بويى الەم ارالاعان كورىنەدى.
وڭتۇستىك افريكانى، ماروككونى ارالاپ، شىعىس ەۋروپا مەن تاجىكستانعا جەتكەن ولار شىعىس ازيا مەن اۆستراليا ارقىلى امەريكاعا ورالماق بولىپتى. الايدا جۇپتىڭ بۇل جوسپارى ورىندالماي قالعان.
ءوز ساياحاتتارىن حالىق نازارىنا ۇسىنىپ وتىراتىن جۇپ تاجىكستان جەرىندە 9- شىلدە كۇنى كوز جۇمادى. ءدال سول قارالى كۇنى ساعات 15:30 دا كۋلياب-دۋشانبە كولىك جولىندا شەت ەلدەن كەلگەن تۋريستەرگە شابۋىل جاسالىپتى.
وندا قىلمىسكەرلەر كولىكتەردەن ءتۇسىپ، تۋريستەردى پىشاقپەن، بالتامەن ۇرعىلاپ تاستاعان ەكەن. ناتيجەسىندە، ءتورت ادام كوز جۇمىپ، ەكى ادام جاراقات العان.
قايتىس بولعان شەت ەلدىكتەردىڭ ىشىندە دجەي وستين مەن لورەن دجوحەگەن گەيگان دا بار بولىپ شىققان.
ال ولاردى ولتىرگەن 1992-1999-جىلى تۋعان جەرگىلىكتى ازاماتتار ەكەن.
3. ءبىرىنشى ەلدە-اق ءولتىرىپ كەتكەن
مەكسيكالىق 25 جاستاعى ماريا ماتۋس تەنوريو ءوز مۋزىكاسىمەن ءبولىسۋ ءۇشىن ساياحاتتاۋعا اتتانعان. ول ءان جازىپ، ءتۇرلى اسپاپتاردا ويناعاندى جاقسى كورىپتى. ءوز ونەرىن حالىققا پاش ەتكىسى كەلگەن بويجەتكەندى ءبىرىنشى ساياحاتتاپ بارعان ەلىندە، كوستا-ريكادا زورلاپ، ءولتىرىپ كەتكەن ەكەن.
ول بريتانيادان كەلگەن تۋريستپەن تانىسىپ، كوستا-ريكاعا اتتانادى. الەم ساياحاتىن باستاعانىنا قۋانىپ، جاعاجايدا قىدىرىپ جۇرگەن قىزعا ەكى ازاماتتىڭ كوزى تۇسكەن ەكەن. ارتىنشا ولار قىزدى الىپ كەتىپ، زورلاپ تاستاپتى.
مارقۇمنىڭ دەنەسىن جەرگىلىكتى پوليتسيا قىزمەتكەرلەرى تاۋىپ العان. كۇدىكتىلەر ەسكيۆەل سەرداس مەن بەناۆيدەس مەندوزا سول كۇنى-اق ۇستالعان.