الماتىدا نەيروحيرۋرگتەر جاڭا يننوۆاتسيالاردى قولدانىپ جاتىر
دەپ حابارلايدى قازاقپارات ءتىلشىسى.
«كرانيوپلاستيكا - باس سۇيەك كەمىستىگىن جويۋ ءۇشىن D3 يمپلانتتاردى قولداناتىن سونى تەحنولوگيا. كۇردەلى باس سۇيەك- مي جاراقاتتارىنا، قاتەرلى ىسىككە، سۇيەكتەرگە وتا جاساۋعا قولدانىلادى. ءبىز وسى ادىستەمەنى ەنگىزگەننەن كەيىن 20-عا جۋىق ناۋقاسقا وتا جاسادىق. سونىڭ ءبارى دە ءساتتى ءوتتى. قازاقستاندا بۇل ادىستەمە بيىلدان باستاپ كەڭىنەن قولدانىلا باستادى»، - دەيدى №7 اۋرۋحانانىڭ 3-نەيروحيرۋرگيا ءبولىمىنىڭ مەڭگەرۋشىسى ۆالەريي تيان.
يمپلانت وتاعا دەيىن ازىرلەنەدى. بۇل وتانىڭ ۋاقىتىن قىسقارتىپ، ينفەكسيا ءتۇسۋ قاۋپىنىڭ الدىن الادى. كرانيوپلاستيكالىق وتالار ازىرگە اۋرۋحانادا جاسالادى.
بيىل قازاقستاندا ادام ساناسىنا كۇردەلى نەيروحيرۋرگيالىق وتا جاسالا باستادى. ونداي وتالار ىسىك ميدىڭ قىزمەتتىك بولىكتەرىندە، ياعني ءبىزدىڭ سويلەۋىمىزگە، قيمىلدارىمىزعا جاۋاپ بەرەتىن بولىكتەرىندە ورنالاسقان كەزدە جاسالادى.
«مۇنداي وتانى بىرنەشە مامان جۇمىلا وتىرىپ جاسايدى. وتا كەزىندە انەستەزيولوگيالىق قۇرال ناۋقاس دارىگەردىڭ قاراپايىم سۇراقتارىنا جاۋاپ بەرە الاتىنداي ەتىپ بەرىلەدى. ياعني، وتانىڭ الدىندا ناۋقاس ۇيقىعا كەتەدى، نەيروحيرۋرگيالىق وتا جاسالىپ جاتقاندا ول ويانىپ، دارىگەرلەرمەن سويلەسەدى. سوسىن جالپى انەستەزيا بەرىلىپ، ول ۇيقىعا كەتكەن سوڭ وتا اياقتالادى. ال ناۋقاس اۋرۋ سەزبەيدى»، - دەيدى نەيروحيرۋرگ دارىگەر جۇلدىز سادىقوۆا.
وتا زاماناۋي، جوعارى تەحنولوگيالىق نەيرووپەراتسيالىق قوندىرعىنىڭ كومەگىمەن جۇرگىزىلەدى.
گۇلزات ساحوۆا