شارا ۇيىمداستىرۋشىلارى سۋىققا توڭبايتىن جەلاياقتىڭ 44 جاستاعى ۆلاديمير پوتلوگ ەكەنىن ايتتى. ەرەكشە سپورتشىنىڭ جۇبايى دينارا پوتلوگ قازاقپارات تىلشىسىنە ەكسكليۋزيۆتى سۇحبات بەردى.
دينارا دا - بۇگىنگى مارافوننىڭ قاتىسۋشىسى.
«ءبىزدىڭ وتباسى سالاۋاتتى ءومىر سالتىن ۇستانادى جانە بارلىق سپورتتىق شاراعا بىرگە قاتىسۋعا تىرىسامىز. ۆولوديا 44-تە بولسا، ءوزىم 40 جاستامىن. ءبىراق، دوستارىمىز بەن ارىپتەستەرىمىز جاس كورىنەسىڭدەر دەپ ايتادى. مۇنىڭ بارلىعى سپورتتىڭ ارقاسى، دۇرىس تاماقتانۋدىڭ پايداسى. ءوزىم مارافونعا ءۇشىنشى رەت قاتىسىپ وتىرمىن، ال كۇيەۋىم قاتىسقان مارافوندار وتە كوپ، ءتىپتى سانىنان جاڭىلاتىن بولدىق»، - دەپ اعىنان جارىلدى دينارا پوتلوگ.
2010 -جىلدان باستاپ، پوتلوگتار وتباسى استانا قالاسىنداعى مورجدار كلۋبىنا بەلسەندى مۇشەلەرىنە اينالعان. -23 گرادۋس ايازدا ءبىر عانا شورتىمەن جۇگىرۋدىڭ سىرى وسىندا جاتىر.
«جالعىز شورتىمەن جۇگىرۋدەن ەش قيىندىق تۋىنداعان جوق. سەبەبى، كۇيەۋىمنىڭ اعزاسى سۋىققا ابدەن شىنىققان. قازىر دە كۇيەۋىم سۋعا سۇڭگۋگە كەتىپ، سىزگە سۇحبات بەرە المادى. وسىمەن سەگىزىنشى جىل ءوزىمىز دە، ءۇش بالامىز دا مۇزداي سۋعا سۇڭگيمىز. اپتا سايىن مورجدار كلۋبىنا بارامىز. بالالاردى جاستايىنان سۋعا ءتۇسىرىپ وسىرگەندىكتەن، اۋىرىپ قالادى دەپ قورىقپايمىز. ولارعا ۇلگى بولۋ ءۇشىن ءوزىمىز دە زياندى ادەتتەردەن اۋلاق بولىپ، سپورتپەن شۇعىلدانىپ، دۇرىس تاماقتانىپ ءجۇرمىز. اقىل ايتقاننان گورى، ىسپەن كورسەتكەن دۇرىس»، - دەيدى د. پوتلوگ.
دينارانىڭ ايتۋىنشا، وتباسىندا قازاقي قۇندىلىقتارعا جانە قازاق ونەرىنە ەرەكشە كوڭىل بولىنەدى. بالالارعا دا قازاقشا ەسىم بەرىلگەن.
كۇيەۋىمنىڭ ۇلتى مولداۆان، ءوزى ارقالىقتا تۋىپ-وسكەن. استانادا (بۇرىنعى اقمولادا) ءبىر ينستيتۋتتا وقىدىق جانە شاڭىراق كوتەردىك. جاڭا ەلوردانىڭ قالىپتاسۋىنا كۋا بولدىق. كۇيەۋىمنىڭ جانى قازاق. ۇلكەن ۇلىمىز مەدەۋ قازاق مەكتەبىنە باردى، قازىر ءبىلىم- يننوۆاتسيالىق ليتسەيىنە گرانتتا وقىپ جاتىر. دومبىرادان رەسپۋبليكالىق، حالىقارالىق بايقاۋلاردا جۇلدەلەر العان. ەكىنشى ۇلىمىز دەمەۋ 14 جاستا، رەسپۋبليكالىق فيزيكا- ماتەماتيكالىق مەكتەپتە ءبىلىم الىپ جاتىر. كەنجەمىز - 8 جاسار ديانا قوبىز ۇيىرمەسىنە بارىپ ءجۇر»، - دەيدى ول.
ايتا كەتەيىك، بۇگىن 1600-گە جۋىق ەلوردا تۇرعىنى ءداستۇرلى اstana Winter Marathon-2018 شاراسىنا قاتىستى. ەرەجە بويىنشا مارافونعا 12-74 جاس ارالىعىنداعى قاتىسۋشىلار جىبەرىلدى. ولار ءتورت شاقىرىم بويىنشا - 42، 21، 10 جانە 5 شاقىرىمعا جۇگىرۋلەرى قاجەت ەدى. ءبىراق ايازعا بايلانىستى 42 شاقىرىم 21-گە دەيىن قىسقارتىلدى.