سەنبى كۇنى قالا باسشىسى جاقسىلىق ومار بىرنەشە الەۋمەتتىك نىساندا بولىپ، ولاردىڭ جۇمىسىمەن تانىستى
وسكەمەن اكىمى الدىمەن قالاداعى ساتبايەۆ داڭعىلىن قيىپ ءوتىپ جاتقان شەشەك وزەنىنىڭ كوكتەمدە سۋ تاسقىنىن تۋعىزۋ قاۋپى بار ۋچاسكەسىنە باردى. تاسقىننىڭ الدىن الۋ جۇمىستارىمەن تانىسقان سوڭ، بىلتىرعى جاعداي قايتالانباس ءۇشىن ءتيىستى ماماندارعا ناقتى تاپسىرمالار جۇكتەدى.
كەيىن جاقسىلىق ومار اتالعان ساتبايەۆ داڭعىلىنىڭ بويىندا ورنالاسقان كوپقاباتتى بەس ءۇيدىڭ جانە ۆينوگرادوۆ كوشەسىندەگى 6 ءۇيدىڭ اۋلاىشىلىك اۋماقتارىن ارالاپ كوردى. بۇل اۋلالاردا ۇيلەر مەيلىنشە تىعىز ورنالاسقان ءارى وينايتىن بالا دا كوپ.
«بۇگىن قالالىق سالا باسشىلارىمەن بىرگە كەلەسى جىلى قايتا جوندەۋدى قاجەت ەتەتىن اۋلالاردى قاراستىردىق. ءبىرىنشى كەزەكتە توزىپ تۇرعان جانە قالا ورتالىعىنان الىس جاتقان اۋدانداردىڭ اۋلالارى زامان تالابىنا ساي جاڭعىرتىلاتىن ءارى كەڭەيتىلەتىن بولادى»، - دەدى وسكەمەن قالاسىنىڭ اكىمى.
سونىمەن قاتار بۇل كۇنى قالا باسشىسى وبلىس ورتالىعىنىڭ ءار ىقشام اۋدانىندا ورنالاسقان №17 -ورتا مەكتەپتە، №10 -مەكتەپ- گيمنازيادا، №34 -مەكتەپ- ليتسەيدە جانە №20 -ورتا مەكتەپتە بولىپ، ءبىلىم ۇجىمدارىنىڭ جۇمىسىنا جانە عيماراتتاردىڭ قازىرگى جاي- كۇيىنە قانىقتى.
كەزدەسۋلەر بارىسىندا ءبىلىم وشاقتارىنىڭ بارلىعىنا جوندەۋ جۇمىستارىنىڭ قاجەتتىگى بەلگىلى بولدى. ولاردىڭ كەيبىرى سالىنعالى بەرى ەشقانداي جوندەۋ كورمەسە، ەندى ءبىرىنىڭ جەرتولەسىنە جىل سايىن كوكتەمدە سۋ تولادى. انىقتالعان تۇيىتكىلدەر بويىنشا قالا اكىمى جاقسىلىق ومار ءتيىستى سالا باسشىلارىنا تاپسىرمالار بەردى.