ۇكىمەت باسشىسى مەگاپوليستە جاس عالىمدار، جوعارى وقۋ ورىندارى جانە كوللەدج ستۋدەنتتەرى، سونداي- اق ينتەللەكتۋالدى مەكتەپ وقۋشىلارىمەن كەزدەستى. بۇدان كەيىن وزىق تەحنولوگيالار ەنگىزىلىپ جاتقان ءبىرقاتار ينفراقۇرىلىمدىق جانە وزگە دە نىسانداردى ارالاپ شىقتى.
قازىرگى تاڭدا 35 جاسقا دەيىنگى 8 مىڭعا جۋىق قازاقستاندىق جاس عالىم عىلىمي زەرتتەۋمەن اينالىسىپ كەلەدى. 138 جوبا اياسىندا وتاندىق عىلىمي ازىرلەمەلەردى ەنگىزۋگە مەملەكەتتىك ەمەس كوزدەردەن 3,2 ميلليارد تەڭگەگە جۋىق قاراجات تارتىلعان. جاس عالىمدارمەن كەزدەسۋ «عىلىم ورداسىندا» ءوتتى.
اڭگىمەلەسۋ بارىسىندا جوعارى ءبىلىم بەرۋ مەكەمەلەرىن زاماناۋي جابدىقتارمەن جاراقتاندىرۋ جانە عىلىمي دارەجەنى تاعايىنداۋ جۇيەسىن جەتىلدىرۋ ماسەلەسى ءسوز بولدى. ەلباسى 2019 -جىلدى جاستار جىلى دەپ جاريالادى. قازىر عىلىمدى دامىتۋ ءۇشىن جاقسى جاعدايلار جاسالۋدا. جاستاردى كەشەندى قولداۋ مەملەكەتتىك ساياساتتىڭ باسىم باعىتىنا اينالىپ وتىر.
ەرلان دوسجانوۆ، حيميا سالاسىنىڭ PhD دوكتورى:
- ءبىزدىڭ ستۋدەنتتەردى، ماگيسترانتتاردى نەمەسە جاس عالىمداردى شەتەلگە ءىسساپارعا جىبەرەدى. ياعني ول 2 اپتا مەن 2-اي كولەمىنىڭ اراسىندا. نەمەسە جارتى جىل، ءبىر جىل كولەمى اراسىندا شەتەلگە ءارتۇرلى ۋنيۆەرسيتەتتەرگە جىبەرىپ وتىرادى. ونىڭ دا كوپتەگەن پايداسى بار.
جۇمىس ساپارى اياسىندا پرەمەر- مينيستر ءبىرقاتار ءبىلىم بەرۋ ورىندارىندا بولىپ، تەحنيكالىق جانە كاسىبي ءبىلىم بەرۋ مەكەمەلەرىنىڭ جەتەكشىلەرىمەن كەزدەستى. باسقوسۋدا كاسىبي مامانداردى دايارلاۋدىڭ جاڭا ۇلگىسى تالقىلاندى. باقىتجان ساعىنتايەۆ ءتورتىنشى ونەركاسىپتىك ريەۆوليۋتسيا جاعدايىندا كادر دايىنداۋدىڭ ساپاسىن ارتتىرۋ كەرەك ەكەنىن اتاپ ءوتتى. جاڭا تەحنولوگيالاردىڭ ەنگىزىلىپ جاتقانىن ەسكەرسەك، قازىرگى مامانداردى قايتا وقىتۋى ماسەلەسى وزەكتى بولىپ تۇر.
ولەگ سوتنيكوۆ، كاسىبي مامانداردى دايىنداۋعا ارنالعان وقۋ ورتالىعىنىڭ جەتەكشىسى:
- بەكىتىلگەن كاسىبي ستاندارتتاردىڭ نەگىزىندە تيپتىك وقۋ جوسپارلارى جاسالدى. ياعني بۇل جەردە ءوزارا بايلانىس ورناپ وتىر. ماماندىقتارعا بايلانىستى قۇرىلىس كومپانيالارى قانداي تالاپ قويسا، وقۋ ورىندارى سولاي وقىتاتىن بولادى.
الماتىنىڭ تەمىرجول ۆوكزالدارى قالانىڭ كوممۋنالدى مەنشىگىنە وتەتىن بولدى. جۇمىس ساپارى كەزىندە پرەمەر- مينيسترگە الماتى-2 تەمىرجول ۆوكزالىندا ىسكە قوسىلعان «كارشەرينگ» جۇيەسى مەن اتالعان نىسانداردى مودەرنيزاتسيالاۋدىڭ جوسپارى تانىستىرىلدى. الداعى ەكى جىلدىڭ ىشىندە ۆوكزالدار قالانىڭ كولىك ينفراقۇرىلىمىنىڭ ءبىر بولىگىنە اينالادى. سونداي- اق باقىتجان ساعىنتايەۆ الماتىداعى ءبىرقاتار تۋريستىك جانە الەۋمەتتىك نىسانداردى ارالاپ كوردى.
www.24.kz