قازاقستانداعى العاشقى جەكپە-جەگىنەن كەيىن ول Vesti.kz سايتىنا سۇحبات بەردى. بوكسشىنىڭ ايتۋىنشا، ول استاناعا WBC Asia بەلبەۋى ءۇشىن جۇدىرىقتاسۋعا كەلگەن، الايدا، ونىڭ قارسىلاسى ءازىربايجان سپورتشىسى فاريد اليەۆ (5-0، 5 ك و) جەكپە-جەكتەن باس تارتتى.
«باستاپقىدا جۇدىرىقتاسۋى كەرەك بولعان قارسىلاسىم جەكپە-جەكتەن باس تارتتى. كەتىپ قالدى. مىقتى مەملەكەتتەن كەلىپ ەدى، كۇشىن كورسەتۋگە. مەنىڭ جەتىستىگىمدى كورىپ، ويى وزگەرگەن سياقتى. ول مىقتى ءبىر مەكتەپ وكىلى، ءبىراق، جەڭەتىنىمە سەنىمدى ەدىم. وسىدان كەيىن «استانا ارلاندارى» ساپىنداعى بوكسشى (ماردان بەرىكبايەۆ) قارسىلاسىم بولدى. وتە بىلىكتى بوكسشى. قازاقستاننىڭ ەكى دۇركىن چەمپيونى. «قارسىلاستىڭ اۋىسقانى تۋرالى جاڭالىقتان كەيىن جۇك جەڭىلدەگەن جوق. بىرەۋلەر ەكى قازاق ءبىر-بىرىمەن جۇدىرىقتاسىپ جاتىر دەپ ويلاعان شىعار. ءبىراق بىرىنشىدەن، بۇل - كاسىپقوي بوكس. رينگتە قارسىلاسقا دەگەن سىيلاستىق قانا بار. جەكپە-جەك تەڭ اياقتالدى، مەن وسىنى قابىلدايمىن»، - دەدى ەلشات نىعماتۋللا ۇلى.
قىتايدا تۋىپ-ءوسىپ، مۇنىڭ الدىندا 15 جەكپە-جەكتى قىتايدا وتكىزگەن ول سوڭعى كەزدەسۋىن قازاقستاندا ۇيىمداستىردى. قانات يسلامنىڭ ىزىمەن قازاقستانعا كەلىپ، ازاماتتىق الاسىز با؟ - دەگەن سۇراققا ول بىلاي دەپ جاۋاپ بەردى: «مۇندا كەلىپ، ءبارىن كوردىم. مەنى قالاي كۇتىپ العانىن. ەلدىڭ دامىعانىن كوردىم، ينفراقۇرىلىمنىڭ. كاسىپقوي بوكس دەڭگەيى قانداي دەڭگەيدە ەكەنىن. نەگە بولماسقا؟ زالدان «ەلشات- ەلشات!» دەگەن قولداۋلار ەستىدىم. بۇل ءۇشىن ۇلكەن العىس. مۇنداي قولداۋعا قۋانىشتىمىن. قازىر ەشتەڭەنى كەسىپ ايتا المايمىن. دەگەنمەن از دا بولسا، ءوز ۇلەسىمدى قوسۋعا دايىنمىن».
ايتا كەتەيىك، ەلشات نىعماتۋللا ۇلى كاسىپقوي بوكسقا ءتورت جىل بۇرىن كەلگەن. قىتايدا وتكەن 15 جەكپە- جەگىنىڭ ەشبىرىن جەڭىلمەگەن - 14 رەت جەڭىپ، ءبىر رەت تەڭ تۇسكەن.
Kaz.tengrinews.kz