جەمقورلىق تاقىرىبىن كوتەرگەن ايتىس: ايبەك قاليەۆ جەڭىمپاز بولدى
تاۋەلسىزدىك كۇنىنە ارنالعان جىر دوداسىنا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن كوكشەتاۋ قالاسى اكىمدىگى قولداۋ ءبىلدىردى. ايتىس ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا جانە «رۋحاني قازىنا» باعدارلاماسىنىڭ «ايماقتىق مادەنيەت، ءداستۇر مەن قۇندىلىقتار» تارماعىنىڭ باستى باعىتىن ىسكە اسىرۋعا ارنالعان.
ق ر مەملەكەتتىك قىزمەت ىستەرى اگەنتتىگى جۇرتشىلىقپەن بايلانىس دەپارتامەنتىنىڭ ديرەكتورى ارمان بەرداليننىڭ ايتۋىنشا، ايتىستىڭ ماقساتى - تاۋەلسىزدىك مۇراتتارى مەن قۇندىلىقتارىن ناسيحاتتاۋ، «رۋحاني جاڭعىرۋ» باعدارلاماسىنىڭ ماڭىزدىلىعىن پاش ەتۋ. سونداي-اق وسكەلەڭ ۇرپاقتى وتان سۇيگىشتىككە تاربيەلەپ، ولاردىڭ تانىم-تالعامىن ۇلت رۋحانياتىنا باعىتتاۋ، قازاقتىڭ ءتول ونەرى ارقىلى مەملەكەتتىك ءتىلدىڭ مەرەيىن ارتتىرۋ، قازىرگى قوعامدا بولىپ جاتقان وزەكتى ماسەلەلەردى، ونىڭ ىشىندە سىبايلاس جەمقورلىق تاقىرىبىن قاۋزاۋ - ايتىستى ۇيىمداستىرۋداعى باعىتتاردىڭ ءبىرى.
«بۇگىنگى تاڭدا جەمقورلىققا قارسى مادەنيەتتى قالىپتاستىرۋ ماسەلەسى مەملەكەتتىك ساياساتتىڭ ماڭىزدى باعىتتارىنىڭ ءبىرى. وسى ورايدا ءبىز جەمقورلىقپەن كۇرەسۋگە بارىنشا كۇش جۇمىلدىرىپ جاتىرمىز. اقمولا وبلىسىندا بۇنداي ەرەكشە ايتىس العاش رەت وتكىزىلىپ وتىر. ونىڭ باستى ماقساتى - اۋزى دۋالى اقىنداردىڭ وتكىر جىرى ارقىلى قوعامعا وي تاستاۋ» - دەيدى ارمان بەردالين.
جىر دوداسىندا ايبەك قاليەۆ، ديدار قاميەۆ، ايتباي جۇماعۇلوۆ، اسپانبەك شۇعاتايەۆ، مۇحتار نيازوۆ، نۇرمات مانسۇروۆ، نۇرلان مۇسايەۆ، اسەم ەرەجە قىزى، مارات احمەتوۆ، جارقىن جۇپارحان، قۇرمەت قۇرالحان، مۇحاممەد قونقايەۆ سياقتى ەلىمىزدىڭ ءار وڭىرىنەن جينالعان، ءتىلى وتكىر، ويى ۇشقىر اقىندار قاتىستى.
ايتىسقا اقىن، ءانشى، سازگەر يران تاسقارا، فيلولوگيا عىلىمدارىنىڭ كانديداتى، رەسپۋبليكالىق ايتىستاردىڭ جەڭىمپازى سەرىكزات دۇيسەنعازين، م. عابدۋللين مۇراجايىنىڭ ديرەكتورى قۇدايبەرلى مىرزابەك، سونداي-اق اقىن، ق ر ەڭبەك سىڭىرگەن جاتتىقتىرۋشى رامازان ساتتىبايەۆ قازىلىق ەتتى.
سايىس قورىتىندىسى بويىنشا ءۇشىنشى ورىندى قاراعاندى قالاسىنان كەلگەن ديدار قاميەۆ جەڭىپ السا، ەكىنشى ورىن قىزىلوردا قالاسىنىڭ تۋماسى مۇحتار نيازوۆقا بۇيىردى. ال ءبىرىنشى ورىنعا قوستانايلىق ايبەك قاليەۆ لايىق دەپ تانىلدى.