يوردانيانىڭ باس قالاسىنداعى كوشەلەردىڭ بىرىنە استانا اتاۋى بەرىلدى

اممان. قازاقپارات - باقىت سۇلتانوۆ رەسمي ساپارىمەن اممانعا باردى، دەپ حابارلايدى قازاقپارات قالا اكىمدىگىنىڭ سايتىنا سىلتەمە جاساپ.

بۇگىن يوردانيا استاناسى كوشەلەرىنىڭ بىرىنە قازاقستاننىڭ ەلورداسى - استانا اتاۋى بەرىلدى. كوشەنى اشۋ سالتاناتىنا قازاقستان استاناسىنىڭ اكىمى باقىت سۇلتانوۆ پەن يوردانيانىڭ باس قالاسى امماننىڭ ءمەرى يۋسۋف ءال- شاۋاريبا قاتىستى.

استانا اكىمى باقىت سۇلتانوۆ قازاقستان پرەزيدەنتى نۇرسۇلتان نازاربايەۆ پەن يوردانيا كورولى  IIابدوللا اراسىنداعى دوستىق قارىم- قاتىناستىڭ وزگەلەرگە ۇلگى ەكەندىگىن، ەكى ەلدىڭ مۇددەسى ءۇشىن قىزمەت ەتەتىنىن تىلگە تيەك ەتتى.

ول امماندىقتارعا ەلباسىمىزدىڭ قىزمەتىنە دەگەن ىقىلاسى ءۇشىن ءوز العىسىن ءبىلدىردى. 2010 -جىلى يوردانيا استاناسىنداعى ورتالىق كوشەلەردىڭ بىرىنە نۇرسۇلتان نازاربايەۆتىڭ ەسىمى بەرىلگەن بولاتىن.

«ءبىز بارشا امماندىقتارعا ءبىزدىڭ ەلباسىعا كورسەتكەن قۇرمەتى ءۇشىن ءوز العىسىمىزدى ايتامىز. جاڭا عانا جوعارى مارتەبەلى شاۋاريبا مىرزامەن بىرگە نۇرسۇلتان نازاربايەۆ اتىنداعى كوشەدە بولىپ، ونىڭ دامۋىن كورىپ قايتتىق. ال ەندى قازاقستان استاناسىنىڭ اتىمەن اتالاتىن كوشەنى اشىپ وتىرمىز. بۇل وقيعا جاس استانانىڭ 20 جىلدىعى تويلانىپ جاتقان جىلى ورىن الىپ وتىر. ول ءبىزدىڭ قالالار مەن ەلدەردىڭ تۇرعىندارى اراسىنداعى قارىم- قاتىناستىڭ نىعايا تۇسۋىنە جاڭا يمپۋلس بەرەتىندىگىنە سەنىمدىمىن»، - دەدى ب. سۇلتانوۆ.

 

ءوز كەزەگىندە اممان مەرى يۋسۋف ءال- شاۋاريبا ەكى ەل استانالارى اراسىنداعى ىنتىماقتاستىقتىڭ الداعى ۋاقىتتا دا جەمىستى بولاتىندىعىنا ءوز سەنىمىن ءبىلدىردى.

«ءبىزدىڭ حالىقتاردىڭ اراسىنداعى قارىم- قاتىناس پەن ەكى ەل باسشىلارىنىڭ اراسىنداعى ساياسي دوستىق وزگەلەرگە ۇلگى. استانا - زاماناۋي قالانىڭ ۇزدىك ەتالونى. ودان الەمنىڭ باسقا قالالارى ۇلگى الادى. سول سەبەپتى، يوردانيانىڭ باس قالاسىندا استانا اتىنداعى كوشەنىڭ اشىلعانى ءبىز ءۇشىن ۇلكەن قۇرمەت. ول ءبىزدىڭ مەملەكەتتەرىمىزدىڭ اراسىنداعى دوستىق پەن جەمىستى ىنتىماقتاستىقتى بەينەلەيدى»، - دەدى يۋسۋف ءال-شاۋاريبا.

كوشەنى اشۋ سالتاناتى استانا اكىمى باقىت سۇلتانوۆتىڭ يوردانيانىڭ باس قالاسىنا جاساعان رەسمي ساپارىنىڭ اياسىندا ءوتتى. كەزدەسۋ بارىسىندا استانا اكىمى مەن اممان ءمەرى ەكى ەلدىڭ الداعى ۋاقىتتاعى ءتۇرلى سالادا ىنتىماقتاستىقتا ءىس جۇرگىزۋىنىڭ الەۋەتىن تالقىلاعان بولاتىن.

 

«ءبىزدىڭ اممانعا ساپارمەن كەلۋىمىز ۋربانيستيكالىق دامۋ سالاسىنداعى ەكى جاقتى ىنتىماقتاستىقتى بەلسەندەندىرۋگە زور مۇمكىندىك بەرەدى. امماندا كولىك، كوگالداندىرۋ، قۇرىلىس، سمارت- تەحنولوگيالار، اكىمشىلىك ۇردىستەردى جەڭىلدەتۋ، اۆتوماتتاندىرۋ، بيزنەس- ورتانى جاقسارتۋ سالالارىندا كوپتەگەن ءىرى رەفورمالار مەن جوبالاردىڭ جۇزەگە اسىرىلىپ جاتقاندىعىن بىلەمىز. استانادا دا اتالمىش باعىتتارداعى جۇمىس بەلسەندى جۇرگىزىلۋدە. بۇل سالالاردا ءبىزدىڭ ءبىر- بىرىمىزگە ۇيرەتەرىمىزدىڭ از بولمايتىندىعىنا ەش كۇمانىم جوق. ءبىز تاجىريبەمىزبەن، بىلىمىمىزبەن بولىسۋگە دايىنبىز» ، - دەپ اتاپ ءوتتى سۇلتانوۆ.

ول سونداي-اق، اممان مەرىنىڭ ەسىنە قازاقستاننىڭ باس قالاسىندا جىل باسىنان حالىقارالىق «استانا» قارجى ورتالىعىنىڭ جۇمىس ىستەپ جاتقانىن سالىپ، يوردانيالىق بيزنەسمەندەردى ونىڭ جۇمىسىنا قاتىسۋعا شاقىردى. استانا كوشەسىنىڭ اشىلۋ سالتاناتىندا قازاقستاندىق جانە يوردانيالىق مۋزىكانتتاردىڭ سۇيەمەلدەۋىمەن ۇلتتىق اۋەندەر شىرقالىپ، ءداستۇرلى حالىقتىق بيلەر ورىندالدى.

ەسكە سالايىق، 2012 -جىلدىڭ قاڭتارىندا استانادا يوردانيا كورولى مارقۇم جوعارى مارتەبەلى حۋسەين بەن تالالدىڭ قۇرمەتىنە كوشە اتاۋى بەرىلگەن بولاتىن. استانا اكىمدىگى مەن اممان قالاسىنىڭ مۋنيتسيپالدى ورگانى اراسىندا تۋىستىق قارىم- قاتىناس ورناتۋ تۋرالى كەلىسىم- شارت 2005 -جىلدىڭ 8 -قاراشاسىندا بەكىتىلدى.