فرانسيالىق «رەنن» كومانداسىنان جەڭىلگەن «استانا» ەۋروپا ليگاسىمەن قوش ايتىستى
ءبىز بۇدان بۇرىن بۇگىنگى كەزدەسۋدىڭ ەكى كوماندا ءۇشىن دە ماڭىزى زور ەكەنىن ايتىپ وتكەن ەدىك. ەكى كوماندا دا سوڭعى تۋرعا دەيىن جارىستى جالعاستىرۋ مۇمكىندىگىنەن قول ۇزگەن جوق. «استانا» سەگىز ۇپايمەن ەكىنشى ورىندا تۇرسا، «رەنن» 6 ۇپايمەن ءۇشىنشى ورىنعا جايعاستى. ءبىزدىڭ كومانداعا تەڭ ناتيجەنىڭ ءوزى جارىستى جالعاستىرۋعا جول اشاتىن ەدى. ال «رەنن» ءۇشىن تەك جەڭىس قاجەت بولدى.
اتالمىش كەزدەسۋدە العاشقى مينۋتتان «استانا» ساپىندا نەناد ەريچ، باكتيەر زاينۋتدينوۆ، ەۆگەني پوستنيكوۆ، مارين انيچيچ، انتونيو رۋكاۆينا، يۆان مايەۆسكي، لاسلو كلياينحايسلەر، ريچارد المەيدا، مارين توماسوۆ، پەدرو ەنريكە مەن دجۋنيور كابانانگا شىقتى. ولارعا قارسى «رەنن» ابدۋلاي دياللو، رامي بەنسەبايني، دامەن دا سيلۆا، مەشەر، اماري تراورە، بەنجامەن بۋريگو، بەنجامەن اندرە، كلەمان گرەنە، يسمايلا سارر، تەوزون سيباچو، حاتەم بەن-ارفا وينادى.
سوندىقتان كەزدەسۋ باستالعان ساتتەن الاڭ يەلەرى شابۋىل شەبىن كۇشەيتتى. ويىن تاعدىرىن ەرتەرەك شەشۋگە تىرىستى. فرانتسۋز فتبولشىلارى ءبىزدىڭ قاقپا ماڭىندا ءجيى بوي كورسەتتى. كەيبىر ساتتە الاڭ يەلەرى ءمۇلت كەتسە، ەندىگى ءبىر ساتتە «استانا» قاقپاشىسى نەناد ەريچ شەبەرلىك كورسەتە ءبىلدى. ماسەلەن، 43-مينۋتتا «رەنن» فۋتبولشىسى حاتەم بەن ارفا جويقىن سوققىنى ءبىزدىڭ قاقپاعا باعىتتادى. بۇل ساتتە نەناد ەريچ ءوز ورنىنان تابىلا ءبىلدى.
ەكىنشى كەزەڭدە «استانا» قورعانىس شەبىن كۇشەيتە ءتۇستى. جارتىلاي قورعاۋشى ريچارد المەيدانىڭ ورنىنا قورعاۋشى ابزال بەيسەبەكوۆ شىقتى. «رەنن» ويىنشىلارى تاعى دا ءبىزدىڭ قورعانىستى مازالاي ءتۇستى. ال 67-مينۋتتا «استانا» قورعاۋشىسى باكتيەر زاينۋتدينوۆ قارسىلاستار ويىنشىسىن ءوز ايىپ الاڭىندا شالىپ جىقتى. تورەشى ويلانباستان پەنالتي بەلگىلەدى. «رەنن» فۋتبولشىسى تەپكەن دوپتى نەناد ەريچ قايتارعان ەدى. دەگەنمەن الاڭ يەلەرى ونىڭ قايتارعان دوبىنا ەرتەرەك جەتتى. وسىلايشا الاڭ يەلەرى گول سوعىپ كەتتى. ول يسمايل سارردىڭ ەنشىسىنە جازىلدى. ول 72-مينۋتتا وسى كەزدەسۋدەگى ءوزىنىڭ ەكىنشى گولىن سوقتى. بۇگىنگى كەزدەسۋدە «رەنن» 2:0 ەسەبىمەن جەڭىسكە جەتىپ، جارىستىڭ كەلەسى ساتىسىنا شىقتى.
بۇدان كەيىن «استانا» ويىنشىلارى ەس جيعانداي بولدى. الاڭ يەلەرى قاقپاسى ماڭىندا بىرنەشە قاۋىپتى ساتتەر ۇيىمداستىردى. دەگەنمەن ونىڭ بىرىندە ءبىزدىڭ جىگىتتەر ءمۇلت كەتسە، ەندىگىسىندە فرانسۋز قاقپاشىسى شەبەرلىك كورسەتتى.
ايتا كەتەلىك، «استانا» بىلتىر ەۋروپا ليگاسى توپتىق كەزەڭىنەن جارىستىڭ 1/16 فينالدىق كەزەڭىنە تۇڭعىش رەت جولداما العان ەدى. ول جولى سوڭعى تۋردا چەحيانىڭ «سلاۆيا» كومانداسىنان 1:0 ەسەبىمەن باسىم تۇسكەن ەدى.
«استانا» بيىلعى ەۋروپا ليگاسى توپتىق كەزەڭىندەگى ويىندارىن ءساتتى باستاعان ەدى. الدىمەن 20- قىركۇيەكتە كيەۆتە جەرگىلىكتى «دينامومەن» 2:2 ەسەبىندە تارقاستى. ودان كەيىن ءوز الاڭىندا 4- قازاندا بۇگىنگى قارسىلاسى - فرانسيانىڭ «رەنن» كلۋبىن 2:0 ەسەبىمەن جەڭسە، سىرتتا 25- قازاندا چەحيانىڭ «يابلونەتس» كلۋبىمەن 1:1 ەسەبىمەن تەڭ وينادى. اتالمىش «يابلونەتسپەن» 8- قاراشادا ەلوردا تورىندە قارىمتا ويىن وتكىزىپ، بۇل كەزدەسۋدە ەلوردالىق كلۋب 2:1 ەسەبىمەن جەڭىسكە جەتتى. ال 29- قاراشادا ءبىزدىڭ فۋتبولشىلار كيەۆتىڭ «ديناموسىنان» 0:1 ەسەبىمەن ۇتىلىپ قالدى.
ەۋروپا ليگاسىنىڭ 1/16 فينالدىق ويىنىنىڭ جەرەبەسى 17- جەلتوقساندا تارتىلادى. جارىستىڭ بۇل ساتىسى 2019-جىلدىڭ 14- جانە 21- اقپان كۇندەرى وينالادى.