كۇيەۋىڭىزدىڭ قورىلىن قالاي باسۋعا بولادى؟

 استانا. قازاقپارات - قورىلداۋ ادامنىڭ ءوز ۇيقىسىن عانا ەمەس، بىرگە تۇراتىن جاقىندارىنىڭ بارلىعىنا تەرىس اسەر ەتەدى.

الەم حالقىنىڭ 45 پايىزى ۇيىقتاعاندا قورىلعا باساتىنىن دالەلدەگەن عالىمدار ودان قۇتىلۋدىڭ جەتى ءتاسىلىن ايتىپ بەردى.

بۇل تۋرالى rambler. ru سايتىنا سىلتەمە جاساعان NUR. KZ پورتالى حابارلايدى.

1. قورىلداۋ اعزاداعى ءبىر اۋرۋ سالدارىنان ەمەستىگىنە كوز جەتكىزىڭىز.

ۇيىقتاپ جاتقاندا تىنىس جولدارىنىڭ تارىلۋىنان قان قۇرامىندا وتتەگى مولشەرى ازايادى. سالدارىنان قان قىسىمى كوتەرىلىپ، ديابەت، كۇيزەلىستىك جاعداي مەن جۇرەك اۋرۋلارىنا الىپ كەلۋى مۇمكىن. سوندىقتان دارىگەر كومەگىنە تەز ارادا جۇگىنۋ كەرەك.

2. تىنىس جولدارىن كەڭەيتەتىن قۇرىلعىنى پايدالانىڭىز. زاماناۋي قۇرالدار مۇرىن جولدارىن كەڭەيتىپ، جەڭىل دەمالۋعا كومەكتەسەدى. ونى كوپتەگەن ءدارىحانالاردان تابۋعا بولادى، دەگەنمەن دارىگەردەن كەڭەس العانىڭىز ارتىق بولمايدى.

3. قورىلداۋعا قارسى مۇشتىك. ءتىس ساۋىتقا ۇقسايتىن بۇل قۇرىلعى جاق پەن ءتىلدىڭ دۇرىس ورنالاسۋىن قامتاماسىز ەتەدى. ول دا تىنىس جولدارىن كەڭەيتەتىن قۇرىلعىمەن بىردەي قىزمەت اتقارادى.

4. دەنە قالىبىن وزگەرتۋ. ارقامەن جاتىپ ۇيىقتاعاندا قورىلداۋ ودان سايىن كۇشەيىپ كەتەدى. سول ءۇشىن ءوزىڭىزدىڭ ارنايى جاستىقتارمەن قورشاپ، ءبىر قىرىڭىزبەن جاتۋعا ادەتتەنگەن ءجون. نەمەسە تۇنگى كيىمىڭىزدىڭ ارقاسىنا قالتا تىگىپ، وندا قاتتىلاۋ زات سالىپ قويساڭىز دا بولادى.

5. ۇيىقتار الدىندا الكوگولدىك ىشىمدىكتەن باس تارتۋ. سپيرتتىك ىشىمدىك تە قورلداۋدى كۇشەيتەتىن فاكتورلاردىڭ ءبىرى. سوندىقتان ونى كەشكى ۋاقىتتا قابىلداماعان ءجون.

6. مۇرىنعا ارنالعان تامشىلار نەمەسە سپرەي. كوبىنەسە ادام مۇرنى بىتەلىپ قالعاندىقتان قورىلدايدى ەكەن. سول ءۇشىن اسىرەسە، اللەرگيالىق اۋرۋدان قيىندىق كورىپ جۇرگەندەر جاتار الدىندا ارنايى تامشىلاردى قولدانعانى دۇرىس.

7. حيرۋرگيالىق وتا. بۇل قورىلداۋدى توقتاتۋدىڭ باسقا تاسىلدەرى ناتيجەسىز بولعاندا قولداناتىن ەڭ سوڭعى جول. وندا كىشكەنە ءتىل مەن جانىنداعى تىندەر كەسىلەدى. كەڭسىرىك قيسايعان جاعدايدا دا وتا جاساتىپ، ونى تۇزەتۋگە تۋرا كەلەدى.