سەمىز ايەل كۇيەۋىن قارنىمەن تۇنشىقتىرىپ ءولتىرىپ الدى

 استانا. قازاقپارات - ا ق ش تۇرعىنى ۆيندي توماس ءوز سۇيىكتىسىن قارنىمەن تۇنشىقىتىرىپ، ءولتىرىپ العانىن مويىندادى.

ونىڭ ىسىنە قاتىستى سوت تىڭدالىمى پەنسيلۆانيا شتاتىنىڭ ەري وكرۋگىندە سوتتا ءوتتى. ناۋرىز ايىندا سالماعى 133 كەلى بولاتىن 44 جاستاعى توماس ازاماتتىق نەكەدەگى كۇيەۋى كينو باتلەرمەن ۇرىسىپ قالعان. ول كۇيەۋىن ۇستەلدىڭ اياعىمەن ۇرىپ- سوعىپ، ارتىنشا قولىن پىشاقپەن تىلگىلەگەن. مۇنان كەيىن ايەل سالماعى 57 كەلى بولاتىن ەر ادامنىڭ بەتىنە قارنىمەن جاتىپ العان. ناتيجەسىندە توماستىڭ استىنان شىعا الماعان ەر ادام تۇنشىعىپ ءولدى.

توماستىڭ قورعاۋشىسى مارك دەل دۋكانىڭ سوزىنشە، قورعاۋىنداعى ايەل كۇيەۋىن ادەيى ولتىرمەگەن. ايتۋىنشا، توماس ىشىمدىك ءىشىپ الىپ، ەس- ءتۇسسىز كۇيدە باتلەردىڭ ۇستىنە قۇلاعان. ايەل ويانعان كەزدە نە بولعانىن ءتۇسىنىپ، بىردەن پوليتسيا شاقىرادى.

الايدا پروكۋرور بۇل نۇسقامەن كەلىسپەدى. ول مارقۇم ەر ادامنىڭ باسىندا ۇستەلدىڭ اياعىمەن ۇرعاننان پايدا بولعان جارالار بولعانىن ايتتى. ءوز كەزەگىندە بۇل توماستىڭ سۇيىكتىسىنە زاقىم كەلتىرگىسى كەلگەنىن دالەلدەيدى، دەيدى پروكۋرور.

سۋديا توماستى كىنالى دەپ تانىدى. ول 18 جىلدان 36 جىلعا دەيىن باس بوستاندىعىنان ايىرىلۋى مۇمكىن. سوتتىڭ ناقتى شەشىمى جەلتوقسان ايىنىڭ سوڭىندا جاريالانادى.

Stan.kz