قىتايعا قازاقستاننان قانداي ونىمدەردى تاسىمالداۋعا بولادى

استانا. قازاقپارات - ۇكىمەتتىڭ بۇگىنگى وتىرىسىندا اگروونەركاسىپ كەشەنىن دامىتۋ باعدارلاماسى قارالدى، دەپ حابارلايدى قازاقپارات ءتىلشىسى.

ق ر اۋىل شارۋاشىلىعى ۆيتسە- ءمينيسترى ارمان ەۆنيەۆتىڭ ايتۋىنشا، بۇگىنگى تاڭدا بالىق، اسىل تۇقىمدى جىلقىلار، قوي ەتى، بال، بيداي، بيداي كەبەگى، سويا بۇرشاعى، راپس، سيىر ەتى، جوڭىشقا، ۇن، وسىمدىك مايى، ارپا مەن جۇگەرى ءۇشىن قىتاي نارىعى اشىق. "وسىنىڭ ارقاسىندا 9 ايدىڭ ىشىندە قازاقستاننان قىتاي ەلىنە اۋىل شارۋاشىلىعى ونىمدەرىنىڭ ەكسپورتى 42 پروتسەنتكە ۇلعايدى. يران تاراپىنان ءتىرى قويدى، توڭازىتىلعان جانە سالقىنداتىلعان قوي ەتىن، سيىر ەتىن، جۇمىرتقا جەتكىزۋگە ارنالعان ۆەتەريناريالىق تالاپتار كەلىسىلدى. بيىل ءتىرى ءىرى قارا مالعا قويىلاتىن تالاپتاردى كەلىسۋ جوسپارلانىپ وتىر. سونداي- اق، ءىرى قارا جانە ۇساق مالدى ساۋد ارابياسىنا، ال ەت پەن ەت ونىمدەرىن، تاۋىق جۇمىرتقاسىن بىرىككەن اراب امىرلىكتەرىنە جەتكىزۋگە قاتىستى شەكتەۋلەر الىنىپ تاستالدى»، - دەدى ا. ەۆنيەۆ مينيسترلەر كابينەتىنىڭ وتىرىسىندا.

ۆيتسە- ءمينيستردىڭ سوزىنە قاراعاندا، وتاندىق 171 كاسىپورىن اۋىل شارۋاشىلىعى ونىمدەرىن ەكسپورتتىق قۇقىعى بار شەتەلدەردىڭ تىزىمىنە كىرەدى. ماسەلەن، 153 كاسىپورىندا ءتۇرلى اگروونەركاسىپ ونىمدەرىن قىتايعا ەكسپورتتاۋعا رۇقسات بار. ال 17 كاسىپورىن بالىق ونىمدەرىن ەۋروپا ەلدەرىنە تاسىپ ءجۇر.