قوستانايدا باتىر بەينەسىندەگى بالبالتاس تابىلدى
بالبال تاستى دەنيسوۆ اۋدانى پوكروۆ اۋىلىنىڭ تۇرعىنى سەرگەي ستياجكين مال باعىپ جۇرگەندە تاۋىپ العان. ول قىلىش ۇستاعان جاۋىنگەر بەينەلەنگەن تاس ءمۇسىندى اۋداندىق مۇراجايعا تاپسىردى.
«بالبالتاس جارتىلاي قۇمعا كومىلىپ جاتتى. باستاپقىدا ءمان بەرمەدىم. كەيىن انىقتاپ قاراعاندا باتىردىڭ بەينەسىن بايقادىم. جالعىز ءوزىم كوتەرۋگە شامام جەتپەگەن سوڭ اۋىلداستارىمدى شاقىرىپ، قىر ۇستىنە شىعارىپ قويدىق»، - دەيدى شارۋا.
كوپ ۇزاماي كونە جادىگەر اۋداندىق مۇراجايعا جەتكىزىلدى. مۇراجاي قىزمەتكەرلەرىنىڭ ايتۋىنشا، ءمۇسىن تابىلعان اۋماقتا بۇعان دەيىن ارحەولوگيالىق قازبا جۇرگىزىلمەگەن.
«ءمۇسىن جان- جاقتى زەرتتەۋدى قاجەت ەتەدى. شامامەن 1000 جىلدىق تاريحى بار تاس مۇسىندە باتىردىڭ بەينەسى قاشاپ سالىنعان. تاس ءمۇسىننىڭ باس جاعى سىنىپ قالعان. باتىردىڭ وڭ قولىنا قىلىش سابىن ۇستاعانىن بايقاۋعا بولادى. تەرىس بەتىندە رۋنا جازۋىنا ۇقسايتىن بەلگىلەر بار. باسقا دا ايرىقشا بەلگىلەر تۋرالى عالىمدار ناقتى اقپارات بەرەتىن بولادى»، - دەدى مۋزەي قىزمەتكەرلەرى.
باتىر ءمۇسىنى قازىر دەنيسوۆ اۋداندىق ولكەتانۋ مۇراجايىندا تۇر. ونى تالاپقا ساي ورناتۋ ءۇشىن ارنايى تۇعىر جاساۋعا تاپسىرىس بەرىلگەن.
اۆتور: قاسقىرباي قويشىمانوۆ