ايبەك نۇعىماروۆ ەكى دۇركىن «الەم بارىسى» اتاندى
فينالدا قازاقستاننىڭ ەكى بالۋانى - ايبەك نۇعىماروۆ پەن ەرسۇلتان مۇزافاروۆ كەزدەستى. بەلدەسۋ 4 مينۋتقا سوزىلدى. العاشقى مينۋتتا ايبەك ەسكەرتۋ الىپ، ەرسۇلتاننىڭ ەنشىسىنە ءبىر ۇپاي جازىلدى. مۇزافاروۆ ەكىنشى مينۋتتا ءادىس جاساپ، ۇپايىن ەسەلەي ءتۇستى. ءبىراق، ءۇشىنشى مينۋتتىڭ ورتاسىنا قاراي ايبەك ەسەپتى تەڭەستىرۋگە جاقىنداپ، تارتىس قىزا ءتۇستى. اقىرى، نۇعىماروۆ ءتورتىنشى مينۋتتا تازا جەڭىپ، جەڭىستى جۇلىپ الدى.
ايتا كەتسەك، جارتىلاي فينالدا ەرسۇلتان مۇزافاروۆ رەسەي بالۋانى رومان بوبيكوۆتان باسىم تۇسسە، ايبەك نۇعىماروۆ گۇرجى بالۋانى گۋرام تۋشيشۆيليدى جەڭگەن ەدى. ءۇشىنشى ورىنعا رەسەيلىك رومان بوبيكوۆ يە بولدى. ونىڭ قارسىلاسى گۇرجى بالۋانى گۋرام تۋشيشۆيلي بوز كىلەمگە شىقپاي قويدى. ايتا كەتسەك، بىلتىر ەلوردادا وتكەن «الەم بارىسىندا» گۋرام تۋشيشۆيليمەن ايبەك نۇعىماروۆ فينالدا كەزدەسىپ، قازاق بالۋانى «الەم بارىسى» اتانعان بولاتىن. 31 جاستاعى ايبەك نۇعماروۆ شىعىس قازاقستان وبلىسىنىڭ تۋماسى.
سپورتتاعى جەتىستىكتەرى: «قازاقستان بارىسى» (2013)، «الەم بارىسى» (2017)، قازاق كۇرەسىنەن 4 دۇركىن الەم چەمپيونى (2010، 2013، 2014، 2016)، قازاق كۇرەسىنەن 4 دۇركىن ازيا چەمپيونى، «قۇرمەت» وردەنىنىڭ يەگەرى، ق ر ەڭبەك سىڭىرگەن سپورت شەبەرى، قازاق كۇرەسىنەن حالىقارالىق دارەجەدەگى سپورت شەبەرى. چەمپيونات الماتىداعى بالۋان شولاق اتىنداعى سپورت سارايىندا ءوتتى. وعان الەمنىڭ ءتۇرلى ەلدەرىنەن 33 بالۋان قاتىستى، قازاقستان نامىسىن 5 سپورتشى قورعادى.
اۆتور: ايان بەكەن ۇلى