نۇرسۇلتان نازاربايەۆتىڭ رەسەيلىك تەلەارناعا سۇحباتى: بولاشاقتىڭ قالاي بولاتىنىن تەك ءبىر جاراتۋشى بىلەدى
دەپ حابارلايدى قازاقپارات ءتىلشىسى.
سۇحبات بارىسىندا جۋرناليست اندرەي كوندراشوۆ پرەزيدەنتتەن قازاقستان مەن ءوڭىردىڭ، ءتىپتى جالپى الەمنىڭ كەلەشەگىن قالاي ەلەستەتەتىنى تۋرالى پىكىرىن سۇرادى.
«كەلەشەك تۋرالى ايتۋ ءجون دەپ ەسەپتەمەيمىن. ءبىز پايعامبار ەمەسپىز. وسى پايىممەن وي وربىتەر بولساق، بولاشاقتىڭ قالاي بولاتىنىن تەك ءبىر جاراتۋشى بىلەرى انىق. ءبىز كەلەشەكتە قازاقستاندى قالاي ەلەستەتەمىز؟ قازاقستاندى ورتالىق ازياداعى ەلدەردەن، شەكارامىز ۇزاق شاقىرىممەن شەكتەسىپ جاتقان رەسەيدەن، 2 مىڭ شاقىرىمدىق شەكارامىز شەكتەسكەن قىتاي حالىق رەسپۋبليكاسىنان بولەك جىرىپ ەلەستەتۋگە كەلمەيدى. ءبارى دە جاعدايلاردىڭ جاي- كۇيىنە تاۋەلدى. ايتادى عوي: ەگەر سەن جەرىڭە ەگىن ەكسەڭ، كورشىڭنىڭ باۋى ارامشوپكە تولىپ تۇرسا، سەنىڭ دە باقشاڭدى ارام ءشوپ باسادى. سول سەبەپتى، ساۋدا جۇرگىزىپ وتىرعان ەلدىڭ دە دامۋىن تىلەۋ وتە ماڭىزدى. ءبىز كەلەشەككە وپتيميزممەن قارايمىز. دامىعان وتىز ەلدىڭ قاتارىنا ەنۋ ءۇشىن ءتيىستى جۇمىستى اتقارا الامىز»، - دەدى نۇرسۇلتان نازاربايەۆ.
ەلباسى ءوز سۇحباتىندا رەسەي باسشىسى ۆلاديمير پۋتينمەن دوستىق قارىم- قاتىناسى تۋرالى دا سۇراققا جاۋاپ بەردى.
«ەكى مىڭىنشى جىلى ۆلاديمير ۆلاديميروۆيچ پۋتين ساياساتقا كەلگەننەن كەيىن- اق ءبىز ءبىرىنشى كۇننەن باستاپ بايلانىس ورناتىپ، بىرلەسە وتە كۇردەلى ماسەلەلەردى شەشىپ كەلەمىز. بۇل، ەڭ الدىمەن، ۇزىندىعى 7,5 مىڭ شاقىرىمعا سوزىلىپ جاتقان شەكارامىزدى ايقىنداۋ ەدى. ءاربىر شاقىرىمدى، ءاربىر مەتردى سىزۋ كەرەك بولدى. قىتايمەن 100 جىل بويى شەكارانى ايقىنداي الماۋ تاريحى ەسىڭىزدە بولار. بۇل وتە ۇلكەن سۇراق. سول سەكىلدى كاسپيي تەڭىزىندە دە ماسەلەنى شەشۋ كەرەك بولدى. شەشەتىن سۇراقتار البەتتە وڭاي ەمەس ەدى. ماسەلەن، رەسەي زىمىران جانە عارىش سالاسىنداعى باستى عارىش ايلاعى بولىپ سانالاتىن بايقوڭىرداعى ماسەلەلەر دە ەسىڭىزدە شىعار. وسىنىڭ ءبارى دە كۇنى بۇگىنگە دەيىن ساقتالىپ كەلە جاتقان ۆلاديمير ۆلاديميروۆيچپەن ءوزارا سەنىمنىڭ، ىزگى قارىم- قاتىناستىڭ ارقاسىندا رەتكە كەلتىرىلدى»، - دەدى مەملەكەت باسشىسى.
نۇرسۇلتان نازاربايەۆ وسى ۋاقىت ارالىعىندا ت م د- دا جانە ەاەو- دا جۇرگىزىلگەن بارلىق ينتەگراتسيالىق سۇراقتاردا قارىم- قاتىناستاردىڭ قىرى ءارتۇرلى بولىپ جاتاتىنىن اتاپ ءوتتى.
«ولاردى ءبىزدىڭ ينتەگراتسيالىق بىرلەستىكتە بىرلەسە شەشىپ وتىرامىز. البەتتە، اۋقىمى مەن ادامي رەسۋرسى، ەكونوميكاسى بويىنشا ءسوزسىز، رەسەي ورتالىق ورىنعا يە. سول سەبەپتى، وسى قارىم- قاتىناس كومەكتەسىپ جاتىر. مەن بۇرىن دا قازاقستان مەن رەسەي اراسىنداعى مەملەكەتارالىق قارىم- قاتىناستار ۇلگى بولا الاتىنىن مالىمدەگەن ەدىم. ەگەر ءدال سونداي قارىم- قاتىناس الەمدەگى كوپتەگەن كورشىلەس ەلدەردە بولسا، ءقازىر باستان وتكەرىپ جاتقان قيىندىقتار بىزدە بولماس ەدى»، - دەدى مەملەكەت باسشىسى.
سونىمەن بىرگە، جۇرگىزۋشى قازاقستان پرەزيدەنتىنەن: «ءسىز ءالى دە ۇستەل باسىندا كەڭەستىك، ورىس اندەرىن ورىندايسىز با؟»، - دەپ سۇرادى. «ال ءسىز شە؟ («ءيا» دەپ جاۋاپ بەردى جۇرگىزۋشى). مىنە، كوردىڭىز بە. مەن وزىمە جاقىن ەكى مادەنيەتتە تاربيەلەندىم - تۋعان قازاق جانە ورىس مادەنيەتىندە. بىزدە ۋاقىت سونداي بولدى. كەڭەستىك كەزەڭدە وستىك. ءبىر ەل، ءبىر تۇسىنىك، كومسومول مەن پارتيا، ينتۋزيازم مەن جاستىق بولدى. ءبىز ءان دە ايتتىق. بارلىق اندەر ءالى كوڭىل تەربەتەدى. اندەر ءارتۇرلى ءارى كوپ. ورىس اندەرى القاپ سىندى، ۆولگا وزەنى سەكىلدى كەڭ، اۋەزدى. ەگەر ءسىز بايقاساڭىز، قازاقتىڭ اندەرى دە اۋەنى شالىقتاعان اۋەزدى كەلەدى. ءبىر امەريكالىق مەيمانمەن وتىرعانىمىزدا ول مەنەن ءانشىمىزدىڭ بىرىنە قاراپ «نەلىكتەن سونشا قاتتى ايعايلايدى؟» دەپ سۇراپ ەدى. مەن وعان «ءبىزدىڭ دالامىزدى قاراڭىز، قازاق بالاسى سول دالامەن كەلە جاتادى دا، بار داۋىسىمەن ءان ايتادى» دەدىم. مىنە، سوندىقتان، بىزدە اندەر تۇرعىسىنان ۇقساستىق بار. وسىنداي اندەردى ايتامىز»، - دەپ جاۋاپ بەردى نۇرسۇلتان نازاربايەۆ.