مەركەل پۋتيننەن ۋكراين تەڭىزشىلەرىن بوساتۋىن سۇراعان

استانا. قازاقاپارات - گەرمانيا كانسلەرى انگەلا مەركەل بۋەنوس- ايرەستە «ۇلكەن جيىرمالىق» ەلدەرى ليدەرلەرىنىڭ سامميتى اياسىندا رەسەي پرەزيدەنتى ۆلاديمير پۋتينمەن جەكە كەزدەسكەن.

كانتسلەردىڭ وكىلى ستەفان زايبەرتتىڭ جۋرناليستەرگە حابارلاۋىنشا، ەكى ليدەر سيرياداعى جانجالدى، رەسەي مەن ۋكراينا قارىم- قاتىناسىنداعى شيەلەنىستى تالقىلاعان.

كرەملدىڭ باسپا ءسوز حاتشىسى دميتري پەسكوۆتىڭ حابارلاۋىنشا، مەركەل پۋتيندى رەسەي ۇستاعان ۋكراينالىق تەڭىزشىلەردى بوساتۋدى سۇراعان، ءبىراق، پۋتين بۇل ماسەلەنى سوت شەشەتىنىن ايتىپ، مەركەلگە كەرچ بۇعازىندا بولعان وقيعانىڭ ەگجەي- تەگجەيىن بايانداعان. پەسكوۆتىڭ سوزىنشە، كيەۆ پەن ماسكەۋ اراسىنداعى قازىرگى داعدارىستى شەشۋ جولىن ىزدەستىرۋ ءۇشىن باتىس ەلدەرىنىڭ اراعايىن بولۋى تۋرالى ماسەلە تالقىلانباعان.

سونىمەن بىرگە پەسكوۆ پۋتيننىڭ ا ق ش پرەزيدەنتى دونالد ترامپپەن قىسقاشا سويلەسكەنىن عانا ايتىپ، ەگجەي- تەگجەيىن كەلتىرمەدى.

وسىنىڭ الدىندا رەسەي پرەزيدەنتىنىڭ كومەكشىسى يۋري ۋشاكوۆ  پۋتيننىڭ «ۇلكەن جيىرمالىق» سامميتىندە ا ق ش پرەزيدەنتىمەن تىڭعىلىقتى اڭگىمەلەسۋ مۇمكىندىگى پايدالانىلماي قالعانىنا «قىنجىلىس» بىلدىرگەنى تۋرالى ايتقان.

بۇعان دەيىن جەلتوقساننىڭ 1- كۇنى پۋتين ترامپپەن 20G سامميتى اياسىندا كەزدەسەدى دەپ جوسپارلانعان. ءبىراق ترامپ رەسەيدىڭ ۋكراينالىق كەمەلەردى ۇستاعانى ءۇشىن پۋتينمەن كەزدەسۋدەن باس تارتقانى تۋرالى مالىمدەگەن.

ارگەنتيناداعى «ۇلكەن جيىرمالىق»  سامميتى اياسىندا پۋتين تۇركيا پرەزيدەنتى رەجەپ ەردوعانمەن، جاپونيا پرەمەر- ءمينيسترى سيندزو ابەمەن كەزدەسەدى دەپ جوسپارلانعان.

www.azattyq.org